ZALEN August 16, 2023 : Vawiin khan Rorelna Dik Duhtute team chuan chanchinthar lakhawmtute an kawm a, sawrkarin Mizoram buh thar lei tuma hmalak a tumna chuan an bawhzui tak tak lo an ti a, Buhfai lei aiin Rice Mill bun a, central sawrkarin a tumpui theih tur Buhhum lei zawk an duh.

Rorelna Dik Duhtute chuan Mizoram-ah Rice Mill bun a, tualchhung thar Buhhum leikhawl tha an ti a, Assam sawrkar pawhin Mizoram ramri dep-ah Mizoram Buh thar te leikhawm a her tumin ramri dep-ah Rice Mill din a tum niin an hria a. Mizoram sawrkar pawhin hemi tur hian chak taka hmalak an duh. Lo neitute Buh thar man man zawka lei sak an nih chuan an tan pawh a hlawk ang a, phurna pein kumkhata vawi 2 (Double Cropping) pawh an kalpui duh an rin thu an sawi. 

Buhhum leina hi Central sawrkar chuan a tum sak theih dawn avanga hmun dang atang pawhin lei se, tuna Buhfai lei ai chuan sawrkar tan pawh a tha zawk dawn an ti. Sawrkarin Buhfai a la lei tlat chu tu ten emaw hlawkna an hmuh avangin a la kalpui lui nia an hriat thu an sawi bawk. 

Rorelna Dik Duhtute chuan state tam tak chuan 2015 atang khan Decentralization Procurement Sheme an kalpui tawh an ti a, he sheme hi Mizoram-ah pawh hmalakna a lo awm nual tawh an ti a, CM pawhin 2022 khan he scheme kalpui tur hian File-ah a ziak tawh a, nimahse tihpuitlin tumna tak tak a awm lo an ti. 

Rajya Sabha MP K. Vanlavena pawhin Government of India (GoI)-ah Lo neitute hamthatna leh hlawkna a awm theih nan a thlen tawh an ti a, GoI pawhin ram chhunga Buhhum lei a, Minimum Support Price pek an inhuam thu leh allotment an hmuh ang chu re-imbursed an pek theih thu April 12, 2023 khan lehkha an rawn thawn tawh an ti. Beiseina sang taka nena an thlir laia hmalakna mumal a awm lo chu pawi an tih thu an sawi a, chak taka hmalak an duh.