Chennai-a hmunpui nei Indian multinational motorcycle manufacturing company Royal Enfield chuan an bike siam chhuah model thenkhat chu thil fel tawk lo awm avangin an la let leh dawn tih Nilaini khan an puang. 

Royal Enfield ten bike an lak let leh tur zawng zawng hi a vai chuan 2,36,966 zet a ni a, ignition coil-ah thil fel hlel a awm vang a nih thu an tarlang. 

Tun hnai khan company lam hian - Meteor, Classic leh Bullet thahnem tak an hralh chhuak a, India mai bakah - Indonesia, Philippines, Thailand, Australia, New Zealand leh Malaysi ah te an thawn chhuak. Mahse heng an thawh chhuah tawhte hi an la kir leh a, thuchhuah an siam zui bawk. 

An thuchhuahah chuan, "Ignition coil-ah thil fel lo a awm tih enchhinna atang-in hriat chhuah a ni a, hei hian thil pawi zawk a thlen palh theih avangin lak kir leha siam that a ni ang," tiin an tarlang.

Bike an lak kir tur te hi Meteor bikah chuan December 2020 atanga kumin April thla inkara an hralh chhuahte a ni a, kumin January-April inkara Classic leh Bullet an hralh chhuah tawhte pawh a huam a, a vai hian nuai hnih chuang zet a tling a ni.