August 17, 2023; Sports minister Robert Romawia Royte chuan an party in MLA seat tam zawk an lak theihna tura an hotute ruahman angin, Hachhek bialah a ding dawn tih a sawi.

Vawiin Aizawl press club a thuthar thehdarhtute a kawmna ah he thu hi sawiin, MNF party a kan hotuten Hachhek bial lamah a tangkai theih an ring tih sawiin, "Seat tam zawk kan lak phahna a nih an beisei tih kan hotuten min hrilh," a ti.

Robert Romawia chuan a dinna bial turah tanlak a ngai dawn hle tih sawiin, Pathian leh bial mipuite duhsakna pawh a mamawh bik tur thu a sawi a, hetihlai hian a bial chhuahsan tur East II chu MLA leh minister a siamtu an nih avangin a thlahthlam loh tur thu te, candidate tha tak pawh an neih a beisei thute a sawi.