August 30, 2023; Zoram Unity Mall, Zuangtuia sa turin sawrkar a inbuatsaih mek a. Central sawrkar Finance Ministry atangin SASCI Part-VI 2023-24 hnuaiah Rs. Vbc. 127 Allocation neih a ni tawh.

Chief minister in a IG official page a a tarlan danin, Unity Mall sakna tur hmunhma hi June ni 29, 2023 khan Tourism Minister leh official dangte, khawtlang hruaitute nen an lo enfiah tawh a. Mipui tana tangkai thei ang bera hman tum niin Mall-ah hian Hotel nuam leh changkang tak te, Food Court, Conference Room, Zo hnam chi peng hrang hrangte pual dawr leh Mizoram district zawng zawng puala dawr te, India ram State leh UT hrang hrangte pual dawrte a awm dawn bakah sumdawnna dawr dang chi hrang hrang a awm thei dawn a ni.

He Mall sak tur hi Tourism leh mahni kutkawiha eizawngte hmasawnna tur atan leh inpumkhatna atan ruahman niin, Zo Hnam inpumkhatna leh insuihkhawmna atan pawh tangkai tak tur a ni ang.

Mizoram sawrkar Tourism department-in chak taka hma lain a tih tur tulte a bawhzui nghal zung zung thin chu lawmawm a ti takzet tih CM chuan a tarlang bawk.