PWD siksawi
PWD Engineer in Chief Vanlaltluanga chu pension-a a chhuah tak avangin March ni 1,2019 atangin K.Lalsawmvela chu E-in-C atan ruat thar a ni a, tuna Chief Engineer awmsa Lalmuankima Henry chu CE (Buildings) atangin CE (Highway) ah sawn a ni a, CE (Planning) Bowman chu CE (Buildings) ah sawn a niiin Jt.Secretary PWD J.Zothanpuia chu CE (Planning) ah dah thar a ni.

Secy. Chanpual
Mizoram sawrkar chuan Secretary te hna chanpual thenkhat a siam rem a, JP Agarwal IAS chu Cooperation ah, Zoramthangi Hauhnar chu LAD leh Social Welfare, Valbuanga chu Irrigation & Water Resources leh Land Revenue, Soil & Water Conservation leh F.Lalthuamluaia chu Sericulture department te chantir an ni.

Tidanglam
Education Department chuan Thawhtanni khan thuchhuah siamin kum 2019 atanga 2020 inkar chhung atan school tan hun a tidanglam a, zing dar 9 ah tan a ni tawh dawn.

Sawipui
Mizoram Chief Minister Zoramthanga chuan Thawhtanni khan Road Transport and Highways Minister Nitin Gadkari chu a chenna banglow-ah hmuin Mizoram mamawh a sawipui.

Vailiam
Department of Industrial Policy & Promotion, Govt of India leh Mizoram Sawrkar in a buatsaih, "Start-Up India Mizoram Yatra" chu Thawhtanni khan Transport Minister TJ Lalnuntluanga’n hawngin Secretariat Office tual atangin Start-Up Yatra Van a vailiam nghal.

Seminar
Thawhtanni khan Aijal Club-ah National Bank for Agriculture and Rural Development (NABARD) buatsaihin State Credit Seminar 2018-2019 neih a ni a, Agriculture Minister C.Lalrinsanga chu khuallian ni in he hun hi a hmanpui a ni.

Conference
Lok Sabha General Election lo awm tur atana inbuatsaihna kal zelah Thawhtanni khan ATI Conference Hall-ah CEO Ashish Kundra hovin Mizoram District zawng zawnga District Election Officer leh Election Officer ten Coference an nei.

VC khawmpui
Ni hnih awh tur All Mizoram Village Council Conference, 2019 chu Thawhlehni khan Pachhunga University College Auditorium-ah neih tan a ni a. Local Administration Department Minister K. Lalrinliana chu khuallian a ni a, “VC te mawhphurhna ti pung tur leh dinhmun tha zawka an din theih nan hma lak mek a ni,” a ti.

Hlan
Thawhlehni kalta khan Jhunjhunu, Rajasthan-ah Shri Jagdishprasad Jhabarmal Tibrewala University (SJJTU) chuan rawngbawlna huanga a hun tam zawk hmang thin, Mizoram Governor Kummanam Rajasekharan chuan a hnathawh that avang te leh mipui harsatnate su kiang tura hlawhtling taka a lo penchhuah thin avangin honorary Doctor of Letters( D.Litt) an hlan a ni.

Thlawhna
Chief Minister Zoramthanga chuan Thawhlehni khan Civil Aviation Minister Suresh Prabhakar Prabhu chu a pisa-ah hmu in Mizoram in thlawhna chungchanga harsatna a tawhte a thlen.

Hearing
Bru camp Tripura-a awm mekte tan form 6,7,8A hmangin Thawhlehni khan electoral roll revision chu Kanhmunah Election Commission hmalakna angin neih a ni.

IC ah ruat
Trade & Commerce Director thin Dr. C.Lalzirliana chu Mizoram State Information Commissioner thar atan ruat a ni a, Governor in hun remchangah rinawmna thu tiam tirin a lalut ang.

Ruihlo ti tam
Nilaini khan Seminar Hall, Department of Education, Mizoram University-ah MSD&RB leh Psychology Department, MZU te tangkawp buatsaihin One day Awareness Programme on Drug Abuse Prevention for University Students neih ani a, Ministry of Social Justice & Empowerment, Government of India in Magnitude of Substance Use in India 2019 a tlangzarhah Mizoram chu ruihhlo ti an tam hle tih tarlan a ni.

Chesual
Nilaini zing dar 7:30 vel khan Home Minister Lalchamliana zuitu Bolero MZ 01 L - 3514 chu Tawipui North II daiah a chesual a, a hmunah mi 3 an thi a, midang 2 in hliam na tak an tuar. Vanduaina a thi te hi R. Lalnunsanga (55) h/o PC Vanlalhruaii, Gen.Secy, MNF Gen. Hqrs, Dinthar, Aizawl, Havilder K. Lalchungnunga (46) h/o Zohmingthangi (Driver) Armed veng South leh F. Ropianga (72) h/o Khawlthangi Ex MNA, Tui-thiang, Aizawl te an ni.

Hawng
Higher & Technical Education Minister Dr. R. Lalthangliana chuan Nilaini khan Saitual College tlawhin Rs nuai 100 senga sak Saitual College Auditorium a hawng a, NIELIT Study Centre thar a hawng nghal.

Science day
Ningani khan ram hmun dangte rualin Mizoramah pawh ‘National Science Day’ hman a ni a, he ni puala inkhawm pui Aizawl-a neihah H&TE Minister Dr.R.Lalthangliana chu khuallian a ni.

Lalut
Ningani khan Mizoram Bharat Scouts & Guides Patron atan Larsap Kummanam Rajasekharan chu Raj Bhavan Banquet Hall-ah lakluh a ni.