Aizawl: Chief Minister Zoramthanga'n Mizoramah RTI Online hman theih turin hawng tawh mahse department lama mawhphurtu tur SPIO ten training an neih phawt loh chuan hman theih a la ni dawn lo a. Department zawng zawngah RTI Online hi hman nghal a la ni dawn lo niin Information & Communication Technology department thawktute chuan ZALEN an hrilh.

Information & Communication Technology thawktute sawi danin tun dinhmunah department thenkhata RTI lam mawhphurtu SAPIO, SPIO leh DAA la training lo an awm avangin hman theih a la ni dawn lo a. RTI training hi SAPIO 124, SPIO 112 leh DAA 27 ten training an nei tawh tih an sawi a, Online ti tur hian in register a ngai tih an sawi bawk.  

Information & Communication Technology a Chief Informatics Officer Dr. Lalthlamuana chuan RTI online chu mipui ten an chhawr tangkai dawn tih sawiin, "Sum leh tha tam tak senga dilna thehlut tura Aizawl kal a ngai tawh dawn lo a, zawhna bo awm thin a pumpelh dawn bakah langtlang takin dilna in a thlen chin a hriat zel dawn a ni," a ti a. Department lam pawhin an awlsam phah dawn nia sawi bawkin, "Department ten RTI man Rs. 10 challan hmanga Treasury ah an dah thin chu ngai tawh lovin online ah chuan GAD hnuaiah Account siamin thun nghal zel a ni dawn a, a awlsam phah hle dawn a ni," a ti.  

Dr. Muana chuan RTI Online chu mipui ten an awlsam pui hle dawn tih sawi bawkin, "Mobile phone leh computer atangin dilna hi thawn theih a ni dawn a. Mobile leh computer nei lo, mahse information dil duh tan hian anmahni puitu tur 'village level entrepreneur' 800 kan nei a. Hei hian an pui thin dawn a ni," a ti a. "Department ten document pawimawh te tam tak tak an xerox thin kha ngai tawh lovin document hi pdf hmangin a pek theih tawh dawn a ni," a ti bawk.

RTI Online hi Mizoramah hman tan ni tawh mahse manual a RTI hman thin chu dan pangngai in a la hman chhunzawm zel theih dawn a. Online RTI hman man hi internet banking, gpay leh card dang hmangin pek theih a ni bawk dawn a ni.