Aizawl: Mizoram chuan kum eng emaw zat kalta atanga a lum ber hunlai a tawng chho mek a, ruah a sur a nih loh chuan khua hian lum lam a la pan zel dawn niin mi thiamte chuan an sawi.
Zalen palai zawhna chhangin Science & Technology department thawktute chuan kumdang zawng aia kumin khua a lum chhan chu ruah a sur loh rei tawh vang niin an sawi a. Kum 2016 April thlaah chuan ruah a sur zauh zauh a, kum 2017-ah pawh ni karthlak deuhthawin April-ah ruah a sur bakah nikum maiah pawh April-ah hian ruah a sur zauh zauh a. Mahse kumin ah erawh chuan April 11 hnu lamah ruah a la sur loh avangin khaw lum hi a zual niin an sawi.
Mizorama kum tela khua a lum chhan chu tlangram lo neih la uar vang niin Science & Technology mi thiamte chuan an sawi a, thingphun uar chuan tun aiin a ziaawm dawn niin an sawi bawk a. Mahse, Mizoram chu ram zim tê a nih avangin a chhehvel ram sik leh sain a nghawng lo thei lo niin an sawi bawk.
Mi thiamte chuan Mizoram sik leh sa chu chawhrualin a lum zawng leh a vawt zawngin a kal tih an sawi a. Kum 32 chhunga Aizawl khawpui bika April thlaah khaw lum lai ber chawhrual hi kum tin celcius degree 0.049-in a sang a, khawvawh lai ber hi kum tin celcius degree 0.097-in a tlahniam a ni.
Kum 31 kalta chhunga Aizawl khawpui a vawh ber tum chu ni 22.1.2017 kha niin hemi nia khaw vawh lam chu degree celcius 2.7 a ni.
&&&&&&&&