Aizawl: Aizawl Municipal Corporation (AMC) chuan Aizawl chu khawpui thianghlim anih theihnan leh mihring hrisel zawkna atan plastic (polythene) khapna a kalpui mek a. Hemi atana bultanna turin kum 2018 Krismas dawn khan kohhran hrang hrangah ngenna siamin ruaithehna atan disposable hmang tlem turin an ngen a. An ngenna hian zawm a hlawh nghal hle a, krismas leh kumthar kan hman zawh takah pawh disposable thleng hmanga ruaitheh an tlem hle.

Zalen palaiin Aizawl khawpuia dispo hmanrua zuartu te a kawmna ah kumdang aiin an bungrua an hralh tlem hle tih an sawi. Aizawl New Market-a dawr neitu pakhat chuan dispo thleng chu an hralh mang lo a, mahse no erawh engngemaw an hralh tih a sawi.

Dawr neitu pakhat dang pawhin tun hnaiah chuan engemaw thianho chaw eikhawmna atana tlem an hralh zeuh zeuh tih loh chu dispo thleng an hralh meuh lo niin a sawi.

Ruai thehna atan dispo thleng kalsan mek anih avang hian kohhran tam tak chuan a thlakna atan steel thleng an hmang a, a hlawmin phai lam atangin an chah nasa hle nia thudawn a ni. Aizawl veng pakhata kohhran hruaitu chuan steel chu a tlo a, hman zawhah silfai a, dahthat leh mai theih anih avangin hman chhunzawm leh an tum tih a sawi.

Dispo thleng thlaktu atan hian kohhran engemaw zat chuan kuhva kawr atanga siam thleng an hmang a. Thleng siamtu Bilkhawthlir leh hmun danga mite chuan an hralh nasa hle a, mipui mamawh an pe hneh lo niin an sawi. Kuhva kawr atanga siam thleng leh plate hi man chawia eitur pe tu 'catering' ho pawhin an hmang nasa hle bawk.

Hetih lai hian mi thenkhat chuan kuhva kawr atanga thleng siam chu a to deuh avangin hman reng atan chuan a hautak deuh niin an sawi a. "Kuhva kawr chu silfai leh dawnin a buaithlak a, hmun hul leh ro tha takah uluk taka dah anih loh chuan a hmuarin a puam thei a. Chuvangin ro tling deuh thleng lei mai hi a tih chi zawkin ka hria," tiin veng pakhata fatu thin chuan a sawi ve thung.