Aizawl August 14, 2023: Vawiin khan ZPM chuan chhung inkhawm hun kan hmang a, he huna thusawitu Vice President Lalthansanga (Chatea) Ex-MLA chuan,  “Sawrkar kalphung a dik lohin miretheite’n an tuar thin a, State dang zara nung ve chauh kan nih avangin kan thalaiten rual an awt a, chuvangin thalaite leh mirethei zawkte’n ZPM an rawn zawm a ni,” a ti.

Chatea chuan, “ZPM chuan kalphung thar - mipui sawrkar tih bak zawrh tur kan nei lova, kan that bik vang leh fel bik vang ni lovin mite’n ZPM-ah beiseina sang tak an nei mek a ni. Tawngtai pawlte’n chhum lo chat lovin he ram tan an tawngtai reng a, ram mipuite’n kan ram a lo dam theih nan tawngtaina an hlan reng bawk. Kalphung thar mipui sawrkar din tumte pawhin kan dawn thleng kan zauh zel a, seat engzat nge kan lak ang kan hre lo. Amaherawhchu, Pathian leh ram mipuite zarah kan sawrkar ngei a rinawm hle a ni,” a ti.

He hunah hian ZPM Leader Lalduhoma, MLA  chuan Lalthachungnunga’n ZPM party tana a hla phuah, “Engtin nge i chhan dawn?” tih chu a tlangzarh a, Lalduhoma chuan, “Hun rei lote chhungin party hla kan ngah ta hle a, tun tum hi mumal deuh taka party office-a kan release hmasak ber a ni a, he ram tan malsawmna thlentu a nih ngei theih nan lawm takin ka tlangzarh a ni,”a ti.