Rualbanlo ten kohhran leh khawtlanga harsatna an tawh hrang hrang leh a sutkian dan sawihona chu Zirtawpni khan Whitestone Conference Hall, Ramhlunah neih a ni. Sawihona hun hi Commissioner, Persons with Disabities Dr. Lalnunthara chuan a kaihruai a, rualbanlote hian mi dangte ang bawkin dikna chanvo an nei tih sawiin biak in leh kohhran hall-ah te rualbanlote tana tel/kal ve theihna siam chu kohhran tinte mawhphurhna a ni tih a sawi. Commissioner chuan tunah hian bengngawng ve ve inneite pawh an awm tawh a, kohhran dan zawhkimte pawh an awm tawh a, an la awm zel dawn a, kohhran serh leh sang ti ve tura sign language thiam rawih ngai te hi thil tha ber niin a lang lo tih sawiin kohhran hrang hrangah hian sign language thiam hi awm se tha a tih thu a sawi a, sign language pawimawhna te sawiho a ni bawk. Rualbanlote kal ve theih tura biak in sak pawimawh dante sawi a ni bawk.