Aizawl July 15, 2024 : Kum thum chhung - 2022, 2023 leh 2024 chhungin ruang chhar 135 an awm a, chung zinga 126 chu mipa an ni a, ruhro a chhar mi pahnih an awm a, mahni intihlum 236 an awm a, lirthei chesuala thi mi 266 an awm.

2022 khan ruang chhar 63 an awm a, heng zinga 60 chu mipa an ni a, tu an ni hriat loh hmeichhe pakhat leh mipa pakhat an awm. 2023 khan ruang chhar mi 51 an awm a, heng zinga mi 46 chu mipa an ni a, tunge an nih hriat loh mipa pahnih leh hmeichhe 1 an awm a, ruhro a chhar pahnih an awm. 2024-ah hian April thleng khan ruang chhar 21 a awm tawh a, tunge a nih hriat lo mipa pakhat a awm.

Kum thum chhung hian mahni intihlum 236 an awm tawh a, 2022-ah mi chhinchhiah chinah mi 125 intihlum an awm a, heng zingah 21 hi hmeichhia an ni. 2023-ah intihlum 81 an awm a, heng zinga 69 te chu mipa an ni a, 2024-ah hian April thleng khan intihlum 30 awmin an zingah 27 te hi mipa an ni.

Lirthei-a chetsualna avangin 2022 khan thi 117 an awm a, 2023-ah khan lirthei chetsualna avanga thi 96 an awm a, 2024-ah hian May thla thleng khan chetsualna avanga thi hi 53 an tling a, kum thum chhung hian lirthei chetsualna avanga thi hi 266 an tling a ni.