Aizawl January 29, 2024 : Mizoram Police-te tana ni hnih awh ND & PS Act leh a kaihhnawih training chu vawiin ni 29.01.2023 khan Aizawl SP Conference Hall-ah hawn a ni a. Mizoram DGP Anil Shukla, IPS-in a hmanpui. He training hi Training Branch, PHQ leh Narcotics Control Bureau te tangkawp buatsaih a ni.

Training hawnnaa thusawitu Anil Shukla, DGP Mizoram chuan, "Mizoram hi drugs tawlhrukna kalkawng a ni ta a, kawng thar tam tak a awm ta bawk. Hengte hi Police leh kan thawhpui agency dangte pawhin kan ven hneh a ngai a ni. Agency dangte nen thawhhona tha tak kan neih zarah Mizoram Police chuan drugs tam tak kan man a. A kaihhnawihah mi tam tak kan man bawk. Mahse, hei hi a tawk lo a ni. Drugs lo kalna leh a kal zelna tur nen lam kan chhui chhuah a ngai a. Chumi kawnga thiamna paw chhuak turin training turin kal khawmte ka chah. Ruihhlo do hi kan hneh ngei tur a ni," a ti.

Kum 2023 khan Mizoram Police chuan Heroin Kgs68.055, Methamphetamine Kg 154.172, Crystal Meth Kg 49.005, Ganja Kg 112.943, Pseudoephedrine Kgs 210.72, Opium Kg 4.918 leh Codeine bottle 112an man a. Heng damdawi man hlut zawng hi tualchhung rate-ah ₹ 49,02,42,395/- a ni a, NDPS case 385 register-in mi 385 an man a, an man zingah hian Myanmar mi 55 an tel a ni.

Training-ah hian district 11 atangin Police mi 46 an tel a, NCB lama mithiam te’n Overview of ND&PS Act, NCB reward policy, search, seizure and arrest, financial investigation, conducting forward/backward linkages – how to connect evidence, PITNDPS and new Psychoactive substances, Precursor chemicals chungchangah training an pe dawn a ni.