Vawiin June ni 26 hi khawvel puma damdawi hman khawloh leh dan lova tawlh dona ni 'International Day Against Drug Abuse and Illicit Trafficking' day a ni a. Mizoramah chuan Pathianni anih avangin nimin leh Zirtawpni ah te mi thahnemngai thenkhat ten an lo hmang tawh a. Mizoram sawrkar chuan he ni pual hian June ni 29,2022 hian Assembly Annexe Conference hall ah hun hmangin Chief Minister chu khuallian tura beisei a ni.

International Day Against Drug Abuse and Illicit Trafficking hi December ni 7,1987 a UNO General Assembly chuan kumtin June ni 26 ah hman tura a rel angin kumtin he ni ah hian ruihhlo hlauhawmzia leh thatlohzia inzirtirna atan hman thin a ni a. Tunkar maiah pawh Excise & Narcotics leh Police te chuan an ruihhlo ma sa engemaw zat chu an tiral tawh bawk.

Mizoram hi kan hriat angin khawvela ruihhlo siamna hmunpui ber golden triangle hnaiah awm kan ni a. Hei mai ni lovin ruihhlo kalkawng ah kan awm bawk a ni. Ruihhlo do kawnga hma latu Excise & Narcotics department leh Police ten theihtawp chhuah mahse a lut hi a tam hrim hrim avangin awmzia a nei thui lo em em mai a. Tunhnaiah phei chuan Myanmar tualchhung buaina avangin Mizorama ruihhlo lut hi a tam lehzual a ni.

Heti tak maia thalaite zingah ruihhlo ti an tam ta mai hi engnge a chhan ni ta ber ang tih ngun taka kan zirchian a, ruihhlo laka kan fihlim theih nan engtia hmalak tur nge tih hi ngun taka kan ngaihtuah a tul ta hle mai. Tunhma deuh chuan Aizawl leh khawpui lian danga thalai ten ruihhlo hi an ti ber a, tunah erawh chuan thingtlang hmun kilkhawr ber pawh a luhchilh ta hial mai!

Tun ang zela ruihhlo ti hi an pun chhoh chuan nakin lawkah kan thalai, hnathawktu ber te hi hnathawk thei lovin an la awm thuai ang tih a hlauhawm a. Mizoram hi chenna tlakah kan siam lo mai ang tih pawh a hlauhawm ta hial mai. Ruihhlo ngeiawmna em em chu thalaite hnathawk thei lova a siam mai ni lovin rukruk leh chhungkaw buaina a kengtel tlat hi a ni.

Kan rama ruihhlo hluar zel tirem tur hian ngaihtuahna kan sen a tul tak zet zet tawh a, tuna fihlim a in ngai te pawh hi nakin lawkah chuan min luhchilh mai a hlauhawm ta. Chuvangin ruihhlo do kawngah hian sawrkar tha nghak kher lova mahni theihna zawn theuha tha kan thawh a ngai a, kan hmelma do tur hian mitinin ke kan pen a ngai tak zet tih i hre thar leh ang u.