Aizawl: Central YMA-in ruihhlo do tura a ruat, Central Anti Drugs Squad (CADS) batch 5-naa member turte lakluhna chu Zirtawpni khan Central YMA committee room-ah neih a ni a, Convener atan YMA CEC atangin R.Lalchhandama an ruat.

Member thar lak luh inkhawm hi Central YMA Vice President Lalhmachhuana chuan a kaihruai a, CYMA President R.Lalngheta chuan fuihna thu a sawi.

CADS member tur hian Aizawl khawpui chhung branch hrang hrang atangin member ruat thin an ni a, batch 5-naah hian member 24 leh a ho khawmtu nihna mi paruk an awm dawn a, convener atan YMA CEC atangin R.Lalchhandama ruat a ni.

CADS member thar lakluh inkhawmah hian CADS 4th batch hnathawhte tar lan a ni a, CADS 4th batch hian heroin hawng 667 manin an thil man hlut zawng hi tual chhung rate-ah Rs 1,66,75,000 hu a tling a. Hemi hun chhung vek hian ruihhlo zuar leh ngawlvei mi 383 an man a, an mi man zinga 60 chu Excise kutah an hlan a, mi paruk chu police kutah hlanin, forest department kutah mi pakhat hlan bawkin mi 248 hnenah counselling pek a ni bawk.