Aizawl: Central YMA-in ruihhlo do tura a din Central Anti Drugs Squad (CADS) member ruat thar te lawmluhna chu Zirtawpni tlai khan Central YMA Office ah neih a ni a. He huna thu sawitu Central YMA President R. Lalngheta chuan YMA-in ruihhlo do chak lo mah se, Mizoramin a chhiatpui miau avangin hma an la leh ta tih a sawi.        

CADS member ruat thar lawmluhna hun hi Central YMA President R.Lalngheta chuan a kaihruai a, ruihhlo do pawl din a nih chhoh leh dan sawiin tun dinhmunah Mizoramah awlsam takin ruihhlo hmuh tur a awm a, a man pawh a tlawm a, hengte avang hian kohhran leh mipui te atangin hma la leh tura YMA auhna a ring viau tih a sawi a. Chutih karah chuan Central YMA pawhin ruihhlo do chu chakawm a ti lo a, a hau tak piah lamah sawisel bur an nihna te pawh a awm tiin, hetiang karah hian Mizoram au aw avangin ruihhlo do kawngah hma an la chho leh ta tih a sawi.

Thusawitu dang Central YMA Vice President Lalhmachhuana chuan Mizoramah ruihhlo a hluar a, ruihhlo ngai centre hrang hranga enkawl tur pawh an pun thu sawiin, "August ni 2 khan Aizawl khawpui chhunga home thenkhat kan be pawp a, ruihhlo ngawl vei enkawl ngai mi 1871 an awm mek tih kan hre thei a, hengte bakah hian centre-a dah loh mi thahnem tak an awm a ni," a ti a. CADS-in ruihhlo do an kalpui turah hian dan kengkawhtu Police leh Excise te'n an uap dawn tih leh Mizoram sawrkar pawhin an hmalakna chu an thlawp tih a sawi.

CADS member ruat tharte lawmluhna hunah hian Mizoram Police aiawh leh Excise & Narcotics department aiawh te'n thu an sawi bakah, Central YMA Zaipawl an zai bawk a. CADS first batch ah hian Convener chu Central YMA Finance Secretary Roneihthanga niin member 50 ruat an ni a, term khat hi thla 2 a ni dawn a ni.