ZALEN Aug. 8, 2024; Mizoram hmingchawia hmingphuah hmasak ber rul species thar hmuhchhuah a ni.

Mizoram University a Department of Zoology a Head ni mek Prof.H.T. Lalremsanga leh Asst. Professor, Dr.M. Vabeiryureilai te chuan India ram hmun hrang hrang leh Max Planck Institute, Germany-a an thawhpuite nen Mizorama rul chi hrang hrang pian phung leh DNA chifangte an zirchianna aṭangin species thar hmuchhuakin a hmingah Mizoram hmingchawiin Smithophis mizoramensis tiin an vuah.

He an zirchianna hi Scientific Journal, Diversity, Switzerland chuan tun nilaini August ni 7, 2024 khan a publish.

He rul chi thar hi Mizoram tlangram hmun hniam aṭanga hmun sang luikawr tuithiang leh a chhehvelah te hmuh ṭhin a ni a. A scientific name atan khawvel scientific huapa Mizo hnam leh Mizoram chawilâr nan Smithophis Mizoramensis, a Mizo hmingah Tuithiangrul, a saphmingah Mizo Brook Snake tih phuah a ni.