July 11, 2022; Rangvamual a ruihhlo do beihpuithlak mektu, Joint committee hruaitute chuan, Mizo thalaiten zu an duh khawp tawh lo ni hial a an hriat thu leh veng pawn atanga Rangvamual pantu za a 90 vel te chu damdawi zawng an nih thu an sawi.

ZALEN zawhna chhangin Local council, YMA leh MHIP te telna, joint committee hruaitute chuan, July ni 6, 2022 atang khan ngawrh zawkin Rangvamual ah ruihhlo do beihpui an thlak tih an sawi a, chhun leh zanah duty an kalpui a, tlaivar a duty an neih changte pawh a awm tih an sawi. 

"Mizo thalaiten ruihhlo kan ban phawk tawk zel ah zu pawh hi kan duh khawplo a ang tawh, zu zawng an awm manglo reng reng a, damdawi zel a ni, Rangvamual a mihring veivak za a 90 velte chu damdawi zawng an ni," joint committee hruaitute chuan tiin, ruihhlo chu khawi atanga lokal nge tih hriat a har thu te, a hlawm lian man a har thu te an sawi. "A man a tlawm si a, a ram anga kan buaipui loh chuan kan hnam tan a pawi thei dawn, a ngaimawhawm khawp mai," an ti bawk.

Joint committee hmalakna in ruihhlo zuar nia an hriatte chu sim turin an ngen a, warning pek mekte an nei a, ruihhlo zuar an man zing a mi, khua leh tui ni lemlo, ramriak ang deuh a Rangvamual a awm chhungkhaw 1 chu, kar hmasa lam khan an veng atangin an lo chhuahtir tawh.

Excise & Narcotics department chhinchhiah danin, kumin July ni 4 thleng khan Mizoramah ruihhlo vanga thi mipa 12 leh hmeichhia 1, an vaiin mi 13 an an awm tawh a, an vaiin heroin vanga thi vek an ni.