ZALEN September 3, 2023 : Aizawl Sahuana dan lova ramsa (exotic birds, lears macaw) rubotute chu police punin zawn mek zel an la ni a, thu zawhfiah mi eng emaw zah awm tawh mah se, vawiin thlengin a rutute man an la ni lo.

Environment & Forest department hotute hnen atanga ZALEN thudawn danin ram dang sava rukbo chungchang hi langsar si loin ngawrh taka chhui mek zel a la ni a, sahuana thawk mi eng emaw zah thu zawhfiah an nih tawk bakah, thla liam ta, August 15 khan inhnamhnawihna nei nia rinhlelh state pawn lam mi, Delhi-a cheng mi panga leh Kolkata-a cheng mi pakhat thu zawhfiah an ni.

Forest department hotute chuan Aizawl sahuan atanga sava rukbo chungchang chhui hna ngawrh taka chhunzawm reng a nih thu te, sahuan lamah pawh zan lama venhim hna tihkhauh zui zel a nih thu te an sawi.

Exotic birds tawlh ruk man, Aizawl sahuana July 1, 2023 zan dar 9:30 vela dah luh chu, July 4, 2023 zingah rukbo a ni tih hriat a ni a, rukbo hun hi zing dar 1-3 nia hriat a ni.

He thil thleng chungchangah hian Sairang PS-ah thubuai ziahluh niin EF&CC chuan thil tisualtute man chhuah theihna khawp information pe theitute chu ‘The Mizoram Reward for Detection of Forest & Wildlife Offence Scheme 2019’-in a phal angin lawmman Rs. 20,000 pek an nih tur thu leh an nihna thupsak an nih tur thu an lo tar lang tawh bawk. 

Central YMA thuchhuak :

Central Anti-Drug Squad-in ram dang sava (lears macaw) an man, EF&CC hnena him taka an hlan rukbo a ni chu an hrethiam lo hle tih thuchhuah siamin an lo tar lang tawh a, sava bo hmuh a nih theih nan leh a bonaa mawhphurtute hrem an nih ngei theih nan hma la turin EF&CC hotute an ngen.