Aizawl: Environment, Forest & Climate Change department chuan tun hnai Kanhmun khuaa sai thihchhan leh mi thenkhatten a sa chan darha an insem nia sawi chungchang chhuichhiang turin Kawrthah DFO an hriattir.

Zalen thudawn danin tun hnai khan hnathawka chhawr sai pakhat, kum 47 a upa chu Kanhmun ah hian a thi a, sai hawhtute hian a neitute chu thil awmdan hrilhin ngaihven turin an ti a. Mahse, a neitute hian an ngaihven loh avang leh an duh ang anga tiral mai tura an tih avangin mi thenkhat chuan sai sa hi chanin an insem a. He thil thleng chungchangah hian Wildlife Rescue and Rehabilitation Centre, Bangalore a an hotu Suparna Ganguly chuan Ministry of Environment, Forest & Climate Change ah complaint a thehlut ta a ni.

Sawrkar laipuiin thil awmdan chhuichiang tura a hriattir angin Mizoram sawrkar chuan lehkha a hmuh atanga ni 5 chhung thil awm dan sawifiah turin Kawrthah DFO chu a hriattir a, lehkha hi July ni 16,2019 khan thawnchhuah a ni a, DFO hian a hmuh tawh leh hmuh loh hriat a ni lo. Sai hi engvanga thi nge chiang taka hriat a ni lo a, a upat tawh avang leh a thawh hah lutuk vanga thi niin sawi a awm a, mahse engmah finfiahna a awm lo a ni.

Environment, Forest & Climate Change department chuan sai chhawr turin an hnen atanga phalna lak phawt a ngai thin tih sawiin Mizoram hmun hrang hranga chhawr mekte hian engmah an hnen atangin phalna an la lo niin Zalen palai an hrilh a. Tun hnaiah pawh Myanmar lam atanga lakluh Vaki engemaw zat an man niin an sawi bawk.