Aizawl: Sairang khawtlang chuan Zirtawpnia an veng rawlthar 3 sawisatute lakah zangnadawmna pek ngei an phut tih an sawi.
Nimin khan Aizawl Press Club-ah chanchinbu mite kawmin Sairang Dinthar, Sihhmui leh Sairang VC, YMA leh NGO-a tel pawl hrang hrangte chuan Zirtawpni kalta tlai dar 4 vel khan Tlawng lui, Vanthangliana kaiah Armed Veng South leh Salem Veng mi thenkhatte chuan Sairang veng rawlthar 3- Vanlalmalsawmtluanga s/o Vanlaldika, PC Vanlalhriat -puia s/o PC Lianthunga leh Lalruatfela s/o Lallawmsanga te chu an lawng hman an phalloh avangin nasa taka an sawisak bakah an lawng pawh an tichhia tih sawiin an dem tak zet tih an sawi.
Pawikhawihtu zinga mi 4 chu Police ten an man tawh nia sawiin mi dang 8 pawh thuneituten a rang lamin man thuai se, an phutawk hremna pek ngei nise an duh tih an sawi.
Luia kal thinte chu mipat hmeichhiat leh ruitheih thil laka fimkhur turin an chah bawk a. Sairang VCP R.Vanlalrammawia chuan, "Tlawng lui leh a chhehvela rawn leng khawthawng te hi kan lo welcome in lo kal zel se kan duh a. Mahse rawn picnic thin ten luidunga kan nul leh thlam te min tihchhiat sak thin hi fimkhur turin kan duh a. hei bakah mipat hmeichhiatna kawngah mawi lo taka che thin an awm hi kan duh lo a. Hetianga khawsa leh ruihhlo rawn keng lut te chungah chuan na taka action lak kan tum tawh a ni," a ti a. Karleh atangin Sairang zero point ah duty dah an tum tawh niin a sawi. Sairang VCP chuan tun tuma an veng rawlthar khawihtute chu kut tuarte inenkawlna senso zawng zawng tumsak vek tur leh lawng khawl an tihchhiat man zawng zawng rul vek turin an phut tih a sawi bawk.
Sairang rawlthar 3 te kutthlak chungchangah hian Police ah FIR thehluh a ni a, nimin tlai thleng khan he pawikhawihna a inhnamhnawih mi 5 chu Police ten an man tawh a, Police man te hi F. Lalruatsanga s/o Sapzinga Armed veng South, Lalrintluanga s/o Biakzuala Armed Veng South, Ramdingliana s/o Zaithanzeli Armed Veng South, Nicky Lalnunmawia s/o Thankima Salem Veng te an ni.