Aizawl June 27, 2024 : Saitual District-a a vawi khatna leh hmasa ber ni turin vawiin khan Mizoram Public Service Commission (MPSC) Combined Competitive Examination buatsaih a ni a, Exam Centre thar hi District Level Observer leh DC ni bawk Dr Lalngura Tlau chuan a tlawh a, Exam Centre Supervisor leh SDO (Sadar) ni bawk Lalthakima Chhangte chuan a tawiawm a ni.

Exam Centre hi Govt Higher Secondary School Building, Saitual niin vawiinah vek hian exam neih nghal a ni a, exam bei tura inziaklut mi 44 ah mi 29 in an exam thei a, heng zingah hian Mipa 18 leh Hmeichhia 11 in an exam a ni. Exam hi chawhma leh chawhnu ah darkar 2 ve ve Paper I leh II an exam. Exam beitu zingah District chhung mi leh sa bakah hmun dang atanga Saituala sawrkar hnathawka awm mek engemaw zat an awm bawk.