March 22, 2022; Aizawl Zoological Park (Aizawl sahuan) a sakei dah a nih hnuah sahuan tlawhtu an pung chho mek a, March ni 14, 2022 a mipui tlawh theih a hawn a nih atanga nimin (kar 1 chhung) thleng khan mi 2,722 in an tlawh hman.

ZALEN thudawn danin, ni khat a sahuan tlawhtu chu chawhrualin mi 400 bawr vel an tling a, holiday ah tlawhtu an pung zual. "Tun hma ai chuan tlawhtu an tam hrim hrim a, tun dinhmuna sahuan rawn tlawhte hmuh duh leh kal chhan chu sakei a ni deuh ber," thudawnna chuan a ti. Sahuan tlawhtute lirthei dahna indaih tawk lohna erawh tun dinhmuna harsatna an neih pakhat a ni.

Sahuan enkawltute chuan sahuan tlawhtu zingah bawlhlawh paih thlahdah tak tak an la tam niin an sawi a, mipuite chu an thil eina kawr, sarang leh bottle te a paihna tur siam ah paih zel turin an ngen. Sahuan hi thawktu lam indaih tawk loh vangin Pathianni ah chuan khar thin a ni.

Aizawl sahuanah hian ramsa chi hrang hrang 29, a vaiin 202 an awm mek a, ramsa dah belh turin hmalak mek zel a ni. Tuna sakei dah thar hi a nu niin, sahuan danga mi sakei pa la turin Environment, Forest & Climate Change (EFCC) an inbuatsaih mek.