Aizawl January 15, 2024 : Tuivawl Bial MLA atana thlangtlingtute hnena lawmthu sawia bial fan hmawr bawkna a neih naah Opposition Leader Lalchhandama Ralte chuan ZPM sawrkar chua hla-ki sang takin an la nghal a, ram tan thawh nasat an tum hle niin a lang a, hun laklawh a hla-ki tihniam thut lo turin a chah. Mizoram state a nih hnua opposition leader pathumna a ni thei chu lawmawm a tih thu a sawi bawk.

Chhantea chuan, Mipuiin duh taka an thlantlin avanga sawrkarna siam ta ZPM sawrkar chuan hlaki sang tak la nghalin, ram tan thawh an tum nasa hle niin a lang a, ram mipui pawhin beisei a nei sang a. Beisei an nih ang ngeia thawk turin Mizoram sawrkar a beisei, hun laklawh a hlaki tihniam thut lo tur leh ram tana Sawrkar hmasa hmalakna kal mekte ral bansan mai lova, chhunzawm zel turin in a duh thu a sawi bawk.

Lalchhandama Ralte chuan Mizoramin State a nih hnuah Party pakhat-in Seat 40-ah seat 10 (1/4th) a lak avanga Leader of Opposition nihna chelh leh thei pathumna a nih thu a sawi a, Chief Minister hlui Lal Thanhawla leh Zoramthanga te lo chelh tawh hnungzuitu ni theia a dinhmun lo inherchhuak chu, sawrkarna chang lo mah se, record pawimawh tak a politics zinkawng atan a nih thu a sawi.

Kum tam tak a dinhmun chelh ang chelhtu hi an lo awm tawh loh thin avangin, a nihna leh chanvo chungchangah pawh ram mipuite leh sawrkar thuneitute ah pawh hrechiang tawk lo an tam viau tih a sawi. Sawrkar khalh ngil kawnga a thawhpui Opposition MLA zahawm tak takte nen inpawh takin an mawhphurhna sang tak chu theihtawp chhuahin an thawk dawn a ni a ti bawk. A hnathawhna kawngah tawngtaipui a mamawh thu sawiin, an puihna a ngen nghal bawk.

Chhantea hian Sawleng, Kepran, East Phaileng leh Pehlawn ah te hun a hmang a, khaw 24 a tlawh chhuak a ni. Khawtinah tlawmngai pawl leh Village Council te leh MNF party mipuite lawmpuina thilpek thahnem tak an lo hlan a. Bial tana hnathawhna kawngah rawtna chi hrang hrangte an lo thlen bawk. Tuivawl bialtu MLA hian Pehlawn Secondary School Building sak thar chu a hawng nghal bawk.