ZALEN Aug. 22, 2024; Vanlalpeka (41) S/o R. Malsawma N.Serzawl chu nizan (21.8.24) dar 7:50 vel khan Tuirial leh Tuimang lui infinna bulah a tla, he thubuatsaih lai thleng hian a chin hriat a la ni lova, tui tla zawn dan turah N. Serzawl Branch YMA chuan ruahmanna a siam nghal.

Thudawn danin, Vanlalpeka hi Sangha mana ei zawng niin a nupui Zari nen Sangha manin an riak dun a. Nimin (21.8.24) tlai lam khan an buk thlang lawk lui kawi hnih vela hla a awm Serzawl khaw mi vek Lalnunzawma te buk/thlam lamah a Lawngleng hmangin leng thla a, he a leng thla hi dar 7:30 velin a haw a. A hran ve vea Lawngleng kar dunin a thianpa Lalnunzawma hian a haw lam hi a thlah a, heta a haw hi Tuirial leh Tuimang infinna, Tuimang lam depah Vanlalpeka hi a tla ta a ni.

Vanlalpeka hi tui a tla a ni tih a thianpa Lalnunzawma hian a hriat veleh a auva, a hmuhzui tak loh a vangin, "Peka tuiah a tla, ka chhan thei lo," tiin a au va. Chumi a au chu luikam Sangha manna buk nghak tute chuan lo hria in an theih angin zawng mahse Vanlalpeka hi hmuhzui a ni ta lo a ni.

He chhiatna tawhna Tuirual leh Tuimang infinna hi N. Serzawl atangin km.14 vela hla a ni a. Tun lai hi fur ruahtui tlak vangin Tuirial tui a len vanglai tak a ni a. Helai hmunah vek hian kum 2022 khan N. Serzawl mi a lo tla hlum tawh a ni. N.Serzawl khua hi Aizawl District chhunga awm niin Darlawn thenawm lawka awm an ni.

Tuitla a awm tih hriat a nih veleh N. Serzawl Branch YMA kaihhruainain tuitla zawn dan tur ruahmanna siam nghal a ni a. Nizan vek khan mi 15 riak lut tura ruahmanna siam a ni a. Fur ruahtui tamlai a nih avangin Tuirial panna kawng hi tun dinhmun ah a tlang that loh avangin motor-in a theih chen chen an kal dawn a ni.

Tun dinhmunah tui a len bakah kalkawng a harsat avangin bul tantu mi 15 te hi zan 2 an riak anga, chumi hnu a thlak leh tur a ruahman phawt a ni. Tui tla hi hmuh leh hmuh loh a zirin ruahmanna la siam chhunzawm tur a dah a ni.