ZALEN September 24, 2023 : Mizoram State Women Commission (MSWC)-in Mizo hmeichhe saruak, live video hluar ta lutuk chungchangah hma laa chhui chiang tura police leh thuneitu dangte a ngenna chu chak taka bawhzui mek a ni.

MSWC Chairperson Lallawmchhungi hnen atanga ZALEN thudawn danin social media-ah mawi lo taka Mizo hmeichhe thenkhat an awm thin chungchangah chak takin police leh thuneituten hma an la mek a, heng tih chingten an thil tih thin chu lung in tan theihna khawp sual a ni tih an hriat chu MSWC duh dan a ni.

MSWC chairperson chuan hemi kawngah hian fimkhur a ngai hle tih ZALEN hrilhin, an lehkha zirnaah tulna chen a awm tawh avangin naupang zawkte thlengin mobile phone an kawl fur tawh a, chumi-ah chuan nu leh paten an fate an enkawlnaah theihtawp an chhuah a tul hle tih a sawi.

Mizo hmeichhe thenkhat, social media mawi lo taka khawsa thinte chu an lakah action lak ngei commission leh police-in tha an ti tih sawi bawkin, chumi tur chuan theihtawp chhuah mek zel a nih tih a sawi bawk.

“Mizo naupang leh tleirawl taksa lang nasa ang chite, mipat hmeichhiatnaa min hruai khawlo thei ang chite hi tih loh tur a ni tih hrechiang vek i la kan duh a, kristian naupang, nula leh tlangval tih atana mawi lo hi chu sim se ka duh tak zet a ni,” MSCW chairperson chuan a ti.