ZALEN October 28, 2024 : Mizote hian favang leh thlasik lai hi ramvah, sapel leh sava veh huna a neih a ni a. Heng hunah hian sava, ramsa leh sava pem chi te nasa taka suat an ni thin a, kumin October leh November thla chhung hi chuan Aizawl District Magistrate chuan Sairawkherh, Silai, Air Rifle leh hmanraw danga sava leh nungchang veh a khap.

Sava zingah hian khawchhak ram thlasik tlansana, South Africa ram an pan hmaa Mizorama lo chawl lailäwk thin Sialsir (Amur Falcon Falco Amurensis) te pawh an tel fo a. Heng Sialsir (Amur Falcon Falco Amurensis) te, sava dang leh nungcha dangte, thlamuang taka an awm theih nan thupek chhuah a ni.

Er. Lalhriatpuia, MCS, District Magistrate, Aizawl District hian BNSS Section 163 (1) in thuneihna a pek angin, Aizawl District huam chhunga mipuite zawm turin a hnuaia mi ang hian thupek a a chhuah e;

"OCTOBER-NOVEMBER, 2024 THLA CHHUNG HIAN MI TUMAHIN SAIRAWKHERH, SILAI LEH AIR RIFLE LEH HMANRAW DANGIN SAVA LEH NUNGCHA DANGTE AN VEHIN AN PÊL TUR A NI LO"

He thupek hian puan a nih atanga thla hnih (2 months) chhung a huam ang a, thupek zäwm lo te chu BNS Section 223 hmangin hrem an ni ang.