Aizawl; Khawpui tui lakna Tlawng lui leh Mizoram lui hrang hrang humhalh tul ti-a veitute chuan a tul anga hma la tur 'Save Mizoram Rivers' pawl an din a. Hmasawnna kawng hrang hrang avangte leh leivung leh bawlhhlawh chi hrang hrang paih dan fel lo avanga Mizorama lui pawimawh tak takte a bawlhhlawh nasat tak bakah lui tui kam zel veitute chu PUC Principal Conference hall-ah an inhmukhawma, he pawl hi an din ta a ni.

Zirtawpnia Pachhunga University College a kalkhawm hi mi 14 niin inhmuhkhawmna hi PUC Principal Prof. H. Lalthanzara’n a kaihruai a, kalkhawmte inhmelhriattirna hun a siam zawhah mi hrang hrangin report leh tul an tihte meeting-ah hian sawi a ni a. Vanneihthanga Vanchhawng chuan Tlawng lui dinhmun leh humhalh a tul dan tlangpui sawiin Mizoram lui leh tuihnate, a bikin Mizoram khaw tam takin tui in tur an lakna Tlawng humhalh tura hmalatu pawl a awm a tul thu leh chumi chungchang sawiho tura inhmuh khawmna chu koh a nih thu a sawi a. 

Romalsawma Hmar chuan April ni 20 leh May ni 5 inkara Tlawng lui (Zobawk-Bairabi) a zawh chhuah chungchang report a sawi a. Tlawng fintu lui hmun thuma ţhena hmun hnih (2/3rd) chu thal laia a kang chah thute, heng lui hnar lama ngaw tha a awm tawh meuh loh thu te, Tlawng chu mi tamtakin ei zawnna atana an hman a nih avanga chhanchhuah a tul thute a sawi bawk a ni. 

Lalnunmawia Chuaungo chuan, Mizorama lui humhalh a ngaihdan leh sawrkar hmalak dan tlangpui a sawi a. Mizoram sawrkarin Tlawng lui venhim nan leh Mizoram lui dangte leh ground water vawnhim nan, Bill pahnih a buatsaih mek thu leh a tul anga heng thila State sawrkarin Dan tha leh changtlung tak a siam ngei nan, rawtna siam leh sawrkar hmalakna bengkawn zui a tul thu sawiin, lui enkawlna dan thar siam tura Bill thar draft mek a nih thu a sawi a. Hengah hian sawrkar finchhuah leh a tul dan anga khalh ngiltu an awm a ngaih thu a sawi.

Pawl hruaitu mumal taka insiamrem hmaa mawh lo phur turin heng mite hi ruat an ni -
1. Vanneihthanga - Convener
2. Prof. H. Lalthanzara - Co-Convener
3. Pu Vanlalruata (Pu Vla) - Co-Convener
4. Dr. K. Vanlaldinpuia - Secretary
5. Vanlalhrima (Mahrima) - Jt. Secretary te an ruat.

Furin Mizoram a nan chilh mek tawh laiin Aizawl khawpui tui lakna Reiek kai Tlawng panna kawngpui sira leivung leh bawlhhlawh hrang hrang paih an tam leh ta hle chu ngaihmawh hmasakah neih tha an ti a, Tlawng fintu Tuithum hnar lama leivung leh bawlhhlawh nasa taka paihte rang taka tih tawp a nih theih nan a tul anga hmalak nghal an tum dawn niin thudawnna chuan a sawi bawk.