Zalen chanchinbu hi a chhuah tirh atang ka la la ve char char a, engati nge tun kum thar atang hian kan hmu ngai ta miah lo mai a, Zalen chanchinbu hi a tawp ta em ni aw? - Ramhlun Venglai Pathlawi Tuiril, thil tui reng reng hi chho zawnga luang thei a ni lo va maw!! I rawn sawi kha chu zaah zain a dik, ka hre thiam vek che. Amaherawhchu, ZNP sorkar hunah chuan chho zawngin kan luantir thei ang. Khawngaihin kum nga chu min lo nghak leh phawt mai ta che. - ZNP Ruhkawl, Aizawl He Mizoram, Kristian rama heti em ema ei rukna a nasat mek lai leh ei rute tan vanram a nih mek laia ram hmangaihtu leh ram hmasawnna duhtu, Ei Ru Do Pawl (PRISM) te chuan Kristian rama ei ruk do a sawt lohzia an hriatin an pawl chu thiah an tum mek emaw ni? PRISM-te hlauh avanga ei ru ngam mang tawh loten an han ei ru lehzual sauh mai tur hi kei zawng ka ngaingam thlawt tawh lo ve! Kan biak Pathian ber hlau lo Kristiante kan ni bawk a, a nih nih i ni tawh mai ang u. Mahse, kan chungah theuh Pathianin lirnghing hmang talin ro a la rel ngei ang le!! - Tea, Azl. hmun danga awm chu hmun danga awm an ni a, hmun dangah lo awm mai mai rawh se; mahse, Pathian biak ai chuan a thil siam hi kan dah pawimawh tawh zawk a nih hi. Pastor Bial eng emaw zat infinkhawm thalai inkhawmpui kan hmang zo ta a ni a, inkhawmpuiah pawh eng tehual kan ang lo ve, punkhawmna satliah ve mai niin a hriat. Chu lo rengah pawh thlarau lam programme ai chuan mihring programme hi a tam tawh em a, thlarau lampang, nun chawmtu hi a awm mawlh lo a ni. Ei tur lah hi a’n awm lo mai mai khawp a, hei vang hi a ni pakhat ang inkhawm pawh kan tlem pharh tawh ni. Tin, ‘Kohhran belh tur’ ti hian kan sawi tehchhen a, a tha tho ve, a nihna takah chuan Pathian hi belh tur tak chu a ni zawk asin. A nih loh chuan ‘Lalpa leh a Kohhran hi belh,’ tia sawi hi a fuh zawk ang. - The Proof Tlangval pakhat pawh a nuin, ‘Engati nge saw lai zu dawrah sawn i luh ziah?’ a ti a, ‘Ka duhzawng a awm a ni mai alawm,’ tiin a chhang. Ni e, pawl chhuakho pawh hi dem ngawr ngawr tur an ni bik lo, duh dan leh ngaihdan a inang lo va, an pawl chhuak ve a ni mai. Duh dan a inan a, ngaihdan a inan bawk a, an chaw tur a awm hunah an lo let veleh mai ang, buai duh vak tur a ni lo. Thlarau lampang programme aiin mihring lam siamchawp programme hi a tam ve bawk em a ni. - Aizawl South Tuboh Tunah chuan Bio-metric enrollment tih tur avangin ngaihventu an tam phah ta hle a; amaherawhchu, mi tam tak chu se bo hnu se kawng khar hnan angin an tlai mah mah tawh a ni. ‘Ka tlai ta,’ an ti a; mahse, a la tlai lutuk lo. Amaherawhchu, hun tha, zalenna neih laia fiahnaa tling zo tura inbuatsaihna kawnga inthlahdahte tan chuan tihngaihna a awm tawh lo vang. Tun hi khawngaihnaah pawh khawngaih lehchhawnna hun a nih avangin Pathian thu leh sorkar thu a inkalhna la hriat tum a tul takzet ta; amaherawhchu, hriat dik loh palh theih a nih avangin mahni ngaihdanah tawp mai lovin, sawi dan chi hrang hrang khaikhin tur a ni. TV leh Biak Inah chuan a veituten hmun an chan loh avangin ngaihthlak tur a awm si lo; chuvangin, mi tam takin pawl rama awm nuam an ti tawh lo a ni. - Point Out Deficit leh Adhoc Aided School-a thawktute hlawh December leh January kan sorkarin a la pe thei lo hi a va zia lo ve! February thla chanve kan thleng leh tep tawh sia...! Hlawh na na na hi chu a hun takah zel pek ni se, thla hnih ngawt hlawh inpek loh hi a tuartu tan a na dawn mang e! - Thlirtu Uirena, tualthahna, rukrukna,zu ruihna etc. te hi kan chenna khawvelah hian kan Pathian hian awm ve turin rem a ti a, awm ve tur an ni, zu pawh. Heng tihrem tum hi engtikah mah a hlawhtling lo vang. Ringtute chuan heng thilte hi kan pumpelh mai tur a ni, chu chu kan rin Pathian duh dan a ni e. Zu khap duh leh duh lo inhnialnaah Pathian thu tanchhanah hman phet i tum tawh lo ang u!! - Teacher Kum 1999-a Presbyterian Kohhran Puitling Sunday School zirlaiah khan ‘KUM SANG ROREL tih hi Isuan a sawi lo va, Paulan a sawi lo va, Tirhkoh dang ziahah pawh a lang hek lo, thleng tur ni se sawi awm tak’ tih inziak kha kan zir a nih kha. Mahse, Johana hnena Isua Krista-in a sawi, Thupuan Bung 20-ah Kum Sang Rorel awm tur thu a sawi sia, Bible chhunga mi nge Sunday School zirlaibua mi kan pawm tak ang le?!! Khawi zawk hi nge dik ang le? Bengsikin lo ngaihtuah ve teh khai! - 8119841979 Zu a van avanga damdawi ti an pung lo in ti a nih chuan in hre sual hle a ni. Thalai ka ni a, ka hrechiang khawp mai, a hrechiang berte zinga mi ka ni ang. - ROBIN Thakthing venga ruihhlo, damdawi an man chu cheng nuai 60 man a ni tih a ni a, a neitu chu MLA John Siamkunga nuphalpa, a in sak enkawlsaktu an ti lehzel si a. Mak ka tih ber chu ruihhloah hian kan ram hruaitua kan thlante - Minister te, MLA te lamhnai an lang ta fo mai hi a pawi takzet a ni. - LALLIANA Mistiri tura training hi chu tha ka ti; mahse, training zote leh mistiri ni sate tan hian hna a va han veng em em ve! Vaiho hian min lo thawh khalh zel alawm. Mistiri ni siin Vaiho helper-ah kan tang leh si, heti chuan training inpek vel hian awmzia a awm hlawl lo, Vai mistiri-ho kan hnawh haw leh si loh chuan. In Mizopui mistirite hi min ring lo em ni? Vaiho hi hnawt haw teh u khai. Vai ringawt chhawr lo hian in Mizopui ngei, in unaute ngei hi min han chhawr teh u. - ZOPA ‘Hna a vang, hna a vang,’ an ti hi chu pawm harsa ka ti thin. Rim taka hnathawka eia in turin kan Pathian pawhin min ti a. Eng hna pawh thawk ila, rinawm tak leh taima taka kan thawh phawt chuan chutah chuan malsawmna a awm a, hahdam taka hnathawh tum kan tam ta deuh a ni lo maw? Miin huan lo ram an siam pawhin rim tak leh taima takin an thawk a, kum tawpah rah duhawm tak an seng thin. Hawh u, kan phak tawk theuhvah hian rinawm leh taima takin eng hna pawh i thawk suau suau ang u hmiang. Mi taima tan chuan hnathawh sen loh a awm reng si a. - 8415052704