Kutzia leh mitmu thla lak chu sakawlh chhinchhiahna putna a ni lo ka tih a, a lo nih si loh chuan chhinchhiahna ni lo tih chu a pawi dawn asin. Hetiang mahni leh mi dangte bumna a ni. Tin, Danpui chuan mi mal zalenna min pe a, a nghet hmiah mai a, UIDAI project erawh chu Danpui buah ziak a lo nih loh avangin tute emaw chuan mi mal zalenna tichhe thei turin ro an rel thei a, vauna thu an puan phei chuan mi tam tak harsatna an thlen thei a ni. Bio Metric enrollment-ah hian India rama cheng zawng zawng kum 5 chin chung lamte chu chhinchhiah vek tur a ni a, khua leh tui pekna erawh a ni lo tiin ziak a ni. Mahse, paragraph dangah chuan hetianga hun bithliah chhunga ti lote chu NPR-ah chhinchhiah an nih ve dawn loh avangin India ram chhunga cheng anga ngaih theih an ni dawn lo tiin a ziak leh tlat a! India khua leh tui nihna pekna a ni lo a tih nen a inkalh tlat a ni. - Point Out Kan khawpui kawng tawt dan ngaihtuah hian Taxi intlanchhawk leh tura tih chu a that ka ring ringawt a. Kan Zoram kawngpui hi a chep tawh lutuk a, a thawl phah deuh mai thei asin. Chutih rual chuan Taxi intlanchhawk tih ni mai lo deuh hian Two-Wheeler pawh hi intlanchhawk ti ve se a thawl phah deuh ngei ang. Taxi ringawt hi chu a tawk ka ti lo deuh a ni. Taxi ai hian Two-Wheeler hi a pung chak daih zawk a nia. Kawngpui thawlna tur atana tha em em mai bawk chu hmeichhia hi license pe chhuak tawp tawp ringawt lo bawk se a thawl phah bawk ngei ang. La khalh thiam mang lovina motor khalh phakna license an neih ve si hian kawng chu a tihchep phah khawp mai. Tin, high security tih hi a tulna ka hre lo bawk khawp mai. India sorkar sum siam tumna chi khat ni bawkin a lang. Pawhsei a nih loh chuan tuman an tizo hman dawn lo bawk. Mipui hi min ngaihtuah ve deuh teh se. - Aizawl South Tuboh Ringtu, mi piangthar kan nih chuan sual, suala thungrulh ve a rem tawh lo va, sual chu thatnaa ngam zawk tur kan ni. Hmelma pawh kan hmangaih tawh zawk ang a; min hmusittu te, min hawtu te, dawta min puhtu te, kan chanai dik lo taka min laksaktu pawh ni se kan khinlet ve a rem tawh lo; an thatna turin kan tawngtaisak zawk ang a; Isua hnenah kan hruai thleng tur hi a ni zawk e. - 8415052704 Rukbote chhuah chungchangah hian mipuite hian sorkar hi kan dem ngawr ngawr a ni lo va, sorkar hian an tih tur an ti lo nia kan hriat vanga dem mai kan ni. Tunah hian kan NGO-te leh mipuite hi inrawlh lo ta ila, kan Home Minister hi pawr tak hian tawng tur a awm hauhin ka ring lo. Kan Mizo unaute chauh an rawn chhuah dan atang hian a hriat hle a ni. Sorkar hmalakna ni se, an vaiin an rawn chhuah ngei tur a ni dawn lo’m ni? Chiangkuang deuhvin mahni party hming mawina ringawt um lovin thu hi sawi thin sela, an la kawl mek Deep Mondal chhuah theih nan hian theihtawp chhuah teh se. Tichuan, thinlung hi a dam deuh ngei ang. - Mizo Tlangval EVM a rintlak, a rintlak loh tia inpuhmawhna article sei pui pui, mahni tan lam sawi mawi paha, tan loh lam sawichhiatna thu ziak, mipuiin thu dik kan hriat phah theihna ni chuang si lo chanchinbuah a lang tam ta hle mai. Nov. 2013 MLA inthlana EVM?hman kha a dik leh dik loh, tihchingpen theih a ni em tih MNF-in an phut anga enfiahtu tur judge pahnih Gauhati High Court-in a ruat tawh a. EVM?tihchingpena SMS hmanga inpuhna thuah police-in case an kalpui mek bawk. EVM dinhmun finfiah tura court thuchhuakte hi a lo chhuah hunah thu dik chu kan hre dawn a, chumi hmaa lo insawichhiat vak vak hi a tangkai lo, i sim teh ang u. Khawvel thiamna sanzia leh makzia chu vansang taka khawl lian leh rit em emte chu, lei atangin Scientist-ten an control theihna a rei tawh. Kan chenna khawvel hi finna leh thiamna inchen lo lutukte chenhona a ni tawh. Mipui hriata thu thehdarhtute pawhin hetiang khawvela cheng kan ni tih hre reng chungin, in thuchhuah leh puanzar turte hi mipui tichiai thei a ni nge, mipui finchhuahna tur thu tih uluk tak leh taima taka enfiah thin turin ka ngen a che u. Thu thehdarhtute avang hian mipuiin thu dik kan hre thei a, thu dik lo pawh thu dik emaw kan ti thei bawk. Mipui thu dik hriattir tura mawhphurtu lian ber leh pawimawh ber chu media a ni si a. - Vanlalchhuanga Hmunphiah chingtute hnena chhiah lak zat tur sorkar leh hmunphiah chingtute inremna fel tak an neih lai mekin, Forest Department-in an department hlawkna an ngaihtuah avanga hmunphiah chhiah an lo tisang ringawt mai hian sorkar an zah lohzia leh kut hnathawktute hmakhua an ngaihzia a lantir a, hei hi sorkar leh mipui tan ngaihzam chi a ni dawn em ni? Tun hnuah hetiang thil hi a thlen leh tawh loh nan he department hotute hi hrem ngei ni rawh se. - Omoma Pu Zu kan zuar dawn/khap dawn a nih chuan a lei turten photo i/d card produce ngei thin sela, once in a week bak chu lei phal lo se. - 8415854978 Forest Minister chu a titha hle mai a. Ani zarah hmunphiah Royalty Rs. 7 chu Rs. 1-a lak a ni dawn ta. Bible-in, ‘Heng mi te ber chunga in ti chu ka chunga ti in ni e,’ a ti a. Bureacret-te aia mi retheita lama tan avanga Minister hi dam reng rawh se! Tin. UMFU-hote pawh hetiang official dan bawhchhetute hi chu khing ngam rawh u. In hnunag mipui tam tak kan ding ngam e. Mi rethei hmusittu chuan a siamtu a hmusit a ni. - Moia dt Zo faten ZO Run sak kan tum a, Chakmaten an phal lo maw? A va rapthlak dawt ta ve! - 9862505887

Sawhkhawk of the Day Kan media-te thahnemngaihna a ropuin a fakawm takzetin ka hria, kan ram maute a hun lova sah trip engzat tak Vairam lamah hian phur thla tawh ang maw..!! An zarah mipuite hriatah hai lanin a awm ta a, a Department changtu Minister pawh hi a mualpho chiang hlein ka hria. Kan Zoram maute paper-a chantir thei ram hruaitu engtikah tak thlan chhuah nachang hria ang i maw? Tunah lah kum 10 atan cheng nuai khat beiseiin kan kun thup a ni mai si a, a hahthlak teh zawng a ni e. Raltiang ram kai chu a la hla deuh a ni e, satel inthlahchhawnna tur tih velah kan la buai mai mai zawng a nih hi. - Jonathana Pu