SAWHKHAWK of the day Tunlai harhna thleng nena inmil lote: 1) MPSC Chairman Kohhran Upa pian kum thubuai neih ngai ta hi; 2) Synod Pastor-in Kohhrana a rawngbawlna phatsana sorkara hlawh tam zawk a thang hi; 3) Rev. Liandawla, 1994-a Synod Pastor pension tawh, a pension hnu kum 7-a MNF sorkarin MIP Chairman-a a dah Congress Media-in MIP Chairman-a sawm avanga pension ni awm taka an sawi hi; 4) Hmar hel awmna Mizoram chhung rambuaia puan tuma Congress sorkar hmalakna hi. - Omoma pu Tea, Azl i chungah ka lawm e. Thu tak ngaina mi kan ni a, thu tak chu maw ‘a ni’ chu ‘ni’, ‘a ni lo’ chu ‘ni lo’, tih a ni a; ‘in ka hria’ tih te, ‘emaw ka tia’ tih te hi thu tak a tling lo, a dang pawh sawi tur tam tak a awm. I mi zawhna lamah lut dawn ila, i sawi awmzia chu Kohhran rawngbawltute tihna a ni mai a, Kraws kawng an zawh tak takin i hria em tih chhanna chu, ‘Aw hria e,’ tih a ni a, ‘mahse’ a awm tlat chu hei hi a ni a. Hmun thuma thena hmun khat chauh an ni, Setana thik tham khawpin kraws kawng an zawhin i ring em tih zawhnna chhanna chu, ‘Aw ring e’ tih a ni. - Hruaitea Vanlala, gas chungchang leh CM hlui intlar thin i sawi hi an deuh i nei. Gas hi kan sorkar hrawn mekah hian kum nga tal tawp kan harsat em em hnuah nikum kum tawp lam atangin kan ziaawm deuh chauh a ni lo’m ni? Han insawi theih vakna tur a awm lo ve. Tin, Pu Andrew-a chungchang hi mi mal inbeihna niin a lang bawk, sorkar hnathawk zawng zawng leh Kohhran hrang hrang hnuaia hnathawk zawng zawng te, a te ber atanga a lian ber thlengin chhui fiah tel ngam law law a tha ang. Sikul tan hma chungchangah MSU-te thiltih hi ka thlawp bawk. Mi zawng zawngin fate sikul kai thlah nan 2 wheeler/car kan nei lo, a neite khan tan hma tha intih thu chanchinbuah chapo takin rawn chhuah suh u. In neih ang nei pha lo, lehkha zir duh tam tak an awm tih hriatpui ula, mi tam zawk tana tha hi a tha tih hre teh u. Tin, kawng chhiat avanga kawngpui dan ngaiho khan dang zel teh u, kum 15 atan tax inpe lawk a, kawng tha neih inphu alawm le! - Puipuii pi Kulikawn Presbyterian Kohhran hian kum 2002 khan Golden Jubilee (an Biak In kawt lungphuna inziak angin 1952-2002)) ropui takin an lawm tawh a (lungphun ni 27.1.2002). Kumin hian Centenary (kum 100-na) an lawm a, Golden Jubilee leh Centenary inkar kum hi a tlem deuh mah mah lo maw? - 97743544495 A hmasain Zalen chibai ka buk e. Kan Central YMA-in SRS an din leh ta a, a lawmawm e. Thil pakhat ngaihtuahna tibuai riau awmin a lang, 11.4.15-a ngawlvei mi 30 chuang an kokhawm a, khang ngawlvei an kohkhawmte kha kan hruaitute khan an ruihhlo tih sim turin an ti ngawt a, addict-te khan an rilru chuan sim an duh theuh vang; mahse, an thei lo, chuvanga ngawlvei ni ta a ni. Tam tak chu nghei duh, mahnia sual chhuak thei lote an ni, puih ngai (damlo)-te an ni a, thu tisaa a chan a ngai dawn a ni. Nghei duh tam tak hian an theih loh chhan an sawi chu suffer tuar hi a ni a. Tuar hi an hlau va, hrehawm an tih em avangin. Chu chu kan SRS-te hian nghei duh tak takte hi puih an tum em, ruahmannate an nei em aw? Hriat a chakawm hle. Tam tak chu kum tam lo ruihchilh tawhte an ni a, thu maia ti tawh lo tura hrilh ngawt chuan kawng a su kaw lo mai thei. Addict tam ber hi zawt ila an duh thu an sawi thin, mahni erawhin an tal chhuak zo lo a ni. Chuvangin, kan hruaituten rem han ruat se, tuna addict tam tak hi an saltanna atang hian an chhuah ngei a rinawm, thu tisaa a chan chauhvin. - 9615177382 Fapa thluak cancer vei ka nei a, zan dar 12:00 hmain a mu ngai lo. A u-te pahnih sikul kal an awm a, pakhat Class VI, pakhat Class I an ni a. Ni tin ei zawnna vangin zing dar 1:00 thlen chang a awm fo bawk. Hma tawka thawha fate sikul kal tur buatsaih hi a har ka ti hle mai, taksa hrisel lo mi ka ni bawk si a, ka fapa Class I zirlai phei chu ka mut kham loh luat avangin zan hnih chu zanriah ei lovin a muhil tlang tawh a, a hriselnain a tuar phah ka hlau hle mai. Hetiang zel a nih chuan keini chhungkua chuan kan tlin hlawl lo a ni ber mai, sikul tan hma hi. Problem kan neih zawng zawng hi ka sawi seng rih lo a ni e. - Hlutea nu, Mission Vengthlang He Mizoram, Kristian rama Mizo Kristiante, kum zabi 20-na hnu lama kan Pathian thu awih dan hi chu, kan par vul chuk a, kan kuhmum a, kan rah leh ngai mang si lo. Kan Bible chuan, ‘an rahah in hria ang,’ a ti si a. Kan rah ve pawhin a thlarau bo vei lo zawngin Kohhran programme, dan ang taka tihlawhtling zawng leh Inkhawmpui rorel thiam zawng leh, budget buai zawng hlirin kan piangthar ta a ni mai lo maw? Inkhawmpuia kan hlim nasat leh kan lâm nasat ang hian kan haw darh hnua kan Kohhran theuhvah a rah hmuh tur awm leh ngai si lo hi... kan tawngtai nasat ang hua a chhanna chiang taka sawi tur kan hre mang lote hi.... Hawh teh u, Kelkanga kal tawh zawng zawng leh kal mekte leh kal tum zawng zawngte par vul ila, kuhmum ila, Bible duh dan angin i rah ngei ang u aw! Thlarau bote veia chhanchhuak turin. Miten min chhiar, min thlir reng e, ka awm danah Krista nun mawi leh chanchin tha keimahah hian hmuh an chak hle. - Tea Azl Kan state sum dinhmun chhiatzia sawi nana kan pu duh tak, Pu Hawla’n, ‘a sen a kawk vu tawh,’ a tih hnu pawh hian inrenchemna lam hawia awmze neia hmalakna hi hmuh tur chu sawi loh, a thu ringawt pawh hriat tur a awm lo chu a nih ber hi maw!! Finance Department-in inrenchemna tura CMO-a rawtna a thlen ve lah chu vut laka vawih ang chauh a ni si. ‘Khuate u, a tlaran zawng zelin aw..’ an ti ni berin a lang. - 9436155847 Keini Mizo Kristiante hian kan inkhawm dawn apiangin he Bible chang hi kan thinlungah i vawng tlat ang u: I Timothea 2:8-10 leh I Petera 3:3,4. - SANGBOIHI Hlimna zawngin rosum khawlin, duham leh rualel reng reng hian i hun zawng zawng i hmang a, thihna lui kam i thlen hun chuan i hun liam hnu i la au ngei ang. - 18yrs girl Lungsum Kartawp atangin Mizorama Kohhran lian ber, Presbyterian Kohhran chuan Bial Inkhawmpui an hmang tan dawn a. An rorel chhuah tam tak hi kum khat chhung mai ni lo, nakin zela Kohhran kalphung tur tam tak a ni dawn a; chumi piah lamah chuan kan ram nghawng dawt dawt thei pawh a awm leh mai thei. Kohhran hruaitute u, miten sawisel thin cheu mah sela huai takin kal teh u. ‘Kan ram dinhmun hi a chhe tawh’ tia iak iakho leh politics hmang leh thil dang hmanga siam that tuma thawktute ai chuan a chhiat a thatah Kohhran hmalakna aia nghawng na thei a awm meuh lo a nia, tang zel ula, Pathian rawn tel zel ang che u. Kohhran seltu tam tak hian an sel dikna chen pawh a awm ang, he inkhawmpui atang hian dikna duh lehzuala in kal theihna tur pawh rel chhuak ang che u. - SMA