Kan mi thiamte zinga mi bawk, Dr. Laldinliana Varte-in zu atanga sumdawng/lalut ram hrang hrangten a nghawng an tawh dan a han tar lan atang hian ZU ATANGA SUMDAWN hi hlawkna leh changkanna thlentu ni lovin chhiatna thlentu a nih zawkzia a chiang tawk viau a ni lo'm ni? A pawnga puia, 'Kohhran chuan a tih awm tak a ti a ni,' tih ngawt a ni lo, Bible hian zu hi a sawi mawi lo hrim hrim, zu ngainatute, buaipuitute chu 'AN CHUNG A PIK E' a ti a ni zawk. CHUNGPIKNA THLENTU chu em ni kan duh zawk? Tisa tak pawhin ram changkangten an khap loh an chhiatpui mek zel lai hian keini ram rethei, kan hruaitu thenkhatte phei chu a nuam leh awlsam bak kal dan hre lo, lal chiah thlahlel, chutiang avanga dawt leh thu tak chawhpawlh nuai maite tuallenna state-ah hian engmah hi thatpui tur a awm tak tak lo ve, a chiang reng mai. - Citizen Lalchika ttv intiin Santish Trophy-a Mizram champion chhan point 3 zingah khan Pathian vang a ni an ti lo kha mak a lo ti a, kei chuan mak ka lo ti vak lo va. Mizoram an champion dawn (85 mins) khan ka thinlungah hawrawppuiin, 'PATHIAN VANG A NI' tih a lo lang hmasa ber a; mahse, ka sawi ka sawi kher lo, mi dang pawh an nih ve tho ka ring. 'TETEA The Great' MFA Honorary Secretary-in Pathian vang a ni a lo tih hmaih palh avanga a mak lo tih chuh! Nakuma kan champion leh chuan Lammuala mipui hmaah kan puantir tawh dawn nia aw! Point 1-100 ah Pathian vang a ni tih lo telh tawh turah ngai ang. Andrew Ralte Lelhchhun, Raipur, Chhattisgarh Mi khirh tak leh zahna chang hre lo, sual Setana hi a huangtau em em a, chhungkua, khawtlang, mi mal nun tihchhiat vek hi a hnapui ber leh a tum lian ber a ni. Inhmuhsitna, inrem lohna thlentirtu pawh he sual Setana bawk hi a ni a; duhamna sual bawiha min hruai luttu tur pawh he sual Setana bawk hi a ni. Mahse, ringtute kan vanneih em emna chu he sual Setana hian kan nun a tibuai ve phak lo va; tin, khawvel tawp thleng pawh hian min thunun thei dawn lo bawk a ni. - 8415052704 Protestant Kohhran a lo pun zel khan rawngbawl hna hi nihna a ni lo va, hna pual sawina a ni zawk tiin Martin Luther-a hian a aupui thin; mahse, hun a lo kal zel chuan hna pual aiin nihna lam chuan a lo buk chho ta zel a. Kohhran chuan a thibeh leh mi narante a lo thliar ta zel a, Nicea Inkhawmpui chuan a lo nemnghet leh ta bawk si! Lal Isuan Thupuana Kohhran 7-te a zilhna thuah pawh khan Nikola thu dik lo a rawn tar chhuah kha he thu bawk hi a ni tiin hrilhfiahtute chuan an sawi thin. Chuvang chuan engvangin nge ni kan inthlei tak em em ang le? Rawngbawlna lamah ni se chuti bawk, missionary tirhchhuahna chungchangah ni se Synod hnuai leh hnuai lo kan ti, Kohhranah ni se mahni lawina Kohhran kan insawi mawisiak bawk. Heti hrim hrim chuan van kai a har duh awm mang e! Pathianah chuan angkhat vek kan ni zawk, thenhran a awm theih mawlh loh. - This Generation Zu in ngai lovin zu an do hneh ngai lo va, zu in miin an do hneh zawk thin. A chhan chu zu in mi chuan zu cheng a hria a, ha nei si lovin a seh nat dante a hria a. A tawpah an in-control-in an in tlem tawlh tawlh a, an ngheiin Pathian an bel leh nge nge thin zawk a ni. Khitianga tih nachang hre lo chu an liam phak phak mai reng a ni zawk, lo dawn ve teh! - Suaka, azl. Mizo upaho hian ngati nge zu hi an hlauh em em mai le? Bible-ah Isua leh a hote kha zu check-in zu siamnate an tihchhiat thu a awm lo reng reng. Bible-in a khap chu ei ruk te, sex hman sual te, mawngkawhur te, milem biakte a ni. Khawvelah hian sa ei mi an awm a, vegetarian an awm a, zu in mi an awm a (zu in mi tam zawk hi rui buai leh mahni taksa leh thlarau nun chhe khawpa in thinte an ni lo tih hriat tur), Mizorama J.H.Lorrain leh F.W.Savidge rawn tirtu, Robert Artington-a pa, Robert Sr. kha zu siamna, Brewert atanga millionaire a ni a, a pa thih hnuah sum pound 200000 a rochung a, hei hi missionary tirh chhuah nan a hmang a, Mizote hi Kristian kan lo nih phah ta a ni. Zu hi a hlauhva hlauh tur a ni lo, tette atangin a that lohzia inzirtir ila, Mizo tam zawk hi chuan zu in hi hremhmun tlak nghalna angah te kan ngaiin ka hria. A ni lo, uire te, ei ru te, milem bia te, mawngkawhur te hi hremhmun tlakna a ni zawk. Zu hi sual tinreng bul a ni; mahse, insum thei tan chuan engmah a ni lo. Zu kan buaipui dan em em hi chu a hnam tê zia tawh em mai, ei rute hi an hausak vang em ni kan do ngam loh? Kohhranah lah ei rua kan hriat chian pawh zirtirtu-ah te kan la zel si. Khawvela awm ve tur hrim hrima Pathianin a siam a ni zu hi chu, ringtute chu zu kan in lo tur tih lam a ni lo, thlarau nun leh taksa tichhe thei khawpin kan eiin kan in tur a ni lo. - TALIBAN RULES Zoram mipuite u, a bikin NGO te, kan vaiin hnam issue-ah tal hi chuan i tang tlang hram teh ang u. MUP leh MHIP ten nu leh pa chan han chang ula, YMA, MZP, MSU leh Prism, Sosa leh a dangten hna kan thawk ang. Tuikukho, Mizorama rawn haw duh lo anmahni hmuna vote an thlaktir hi kan dodal dawn a nih chuan Election hi Boycott ang u aw! Chu chuan central-ah thu a sawi ring ber ang tih ka ring. - Valpuia pa Department hrang hrang, a bik takin engineer department-te an hnathawhna tur pawisa tam zawk chu administrative approval a la chhuak lo a ni a, March thla ral hmain an chhuak ang a, March thla ral hmain hman zawh tumin an han buai leh ang a, hetah tak hian alawm mipui pawisa tam tak chheprelh or eiruk a nih thin, Prism te, Sosa, chanchinbuho te he hunah hian sorkar office pawisa khawihhoah hian kal kual mah teh u, mak inti khawp ang. - LIANA Congress, sorkar chak inti em em hi dan leh thupek kenkawh kawngah a hlawhchham avangin dan thain awmzia a nei thei lo. Zu khuahkhirh dan tha tak kenkawhna kawngah an hlawhchham a, her rem hret an tum phah a, kan buai ta hle a nih hi. Ai kal lak phal loh thupek khauh tak an chhuah a, a rukin ai kal la hum bik an nei a; garrage nei lo tan lirthei lei an khap a, tun hma ang thovin lirthei lei duh apiangin an lei tho va. Kawngpui sira motor dah an khap a, tun hma atanga regular taka motor dahnaah motor dah a ni reng tho va. Curruption pho ro an tiam a, a ruka sum insiam tawnin tute emaw hminga hna thawkin thiltithei chin an hausa chak em em a. NLUP sum tawktarha hmangin mipuiin Congress an vote a, NLUP dawngtute hlawhtlinpui tur trade thlansak an tlem em em a, an dawn tur sum pek dan a mumal leh si lo. Sorkarin a tih tur a ti alawm tih tur tingin NLUP an kalpui a, NLUP dawngtute tan erawh an dawn chhan anga ti thei turin sum pek an ni si lo. Mi rethei kan VIP titu sorkar hian VIP tihbo aiin mi rethei vote an hmuh theihna tura sum hman dan an thiam em em a ni tih hi Mizo mipuite hian kan hriat chhuah a va tul tak em! He politics hi retheihna bawiha kan tanna tur thang hlauhawm tak, mi tam tak min bawih tlattu a ni e. - Congress hrechianga

K.Chhawnthiama leh Rev. Chanchinmawia te hian inan riauna an nei. Sorkar ding lai an hlau lo hle, an tanna dik leh dik lo hretu chu anmahni leh Pathian a ni. Mi langsar bei tur chuan mi langsar bawk a ngai. Ram a kal sual chuan England, Kristian ram thovah John Bunyan-a chuan thu a hril a, jail-ah an khung tlat a ni. Hman deuhvah pawh khan kan poilitician thawm na tak tak, party hranga awm chuan na takin sorkar an bei a, pakhatin sorkar vauna avanga mipui hriata thupha a chawi mai laiin pakhat chuan a chawi ve duh lo va, court-a din leh jail tan thlengin a ngam tlat a ni. Mahni kalna line-a inpe thuk hi an ropui. - Fb 2 SAWHKHAWK of the day Zu khap leh khap loh inhnialna a tam ta hle a, kei chu khap loh hi tha ka ti chungin tuna hlih an tum dan hi chu a tha ka ti hlawl lo. An hlip dawn a nih law law chuan MADE In MIZORAM, Mizo zu, Mizorama thar chhuah chauhte hi phal se. Kan thlai thar chhuah tawih mai maite zawng zawng hi zu-ah chhuah ta ila, market lah a chiang sa ni bawk si, Kan Mizo zute kha han uar thar leh ila, ram pawnah te thawn chhuak zawk ila. ZU CHHIAH TLEM LO LAK AI HI CHUAN A MAN PUM PUI CHAN HI A THA ZAWK LO MAW? - 8794339082