Sawhkhawk of the day IN chanchinbu ka lo sawisel ve ziahna che u, a phek hma leh hnung buaichuar emaw ni, rawng ti deuh buaih ang chi kha a awm ngai ta lo va, a hmuhnawm sawt a, chhiar pawh a châkawm sawt niin ka hria.?Chhut sual pawh in nei tlem ta hle bawk. Tan in han lak tak tak chuan a tha sawt sawt mai alawm, sawiselna hmang tangkaia a tha zawnga insiam phah nana hmangtute hi mi fing chu an ni mai e. - Awmtea Kar hmasaah khan Fakpuii khan a rawn sawi tawh a, a dik ka ti khawp mai. Kan sawisel nasat em em thinna che u, chhut sual a tlem tawh khawp mai a, a langsar chu a awm ta meuh lo zawk a ni ta a, chhiat a nawm phah sawt mai. In thuchhuah thinte pawh min tibengvartu a ni zel a, Pathianni tukah chuan chhungkuain kan inchuh ta fo mai che u. - Amah Hriata Tun Tum Issue chu regular-a ziaktute an rawn kim leh ta a, a hlu lehzual sawtin ka lo hria. Chanchinbu phek tam lo takah chhiar tur chikim tak in telh thei a, regular-a thu in ziaktir thinte hi a tha ber thlan tur pawh a awm lo va, in chanchinbu chhiar timanhlatute vek an ni a, tu emaw ber a kim loh pawh hian lung a leng hman deuh tlat zel mai!! - Mr. Zalen Issue hnuhnung pahniha Sawhkhawk-a in rawn ziah, tunlaia tawng dang film, Mizo tawnga lettute hi an fakawm a, mi tam zawkin a awmzia kan hriat loh kan tawng ngeia min entirtute an ni a, hna tha tak an thawk a ni. Chutih rual chuan mi dangte pawhin an lo sawi tawh angin Mizo tawng dik tawk lo an hmang leh zauh thin a, thangtharten an en nasa si a, kan tawng tha tak tak hi a bo mai ang tih a hlauhawm hlein ka lo hre ve a ni. - Ama Hmara Kar hmasaa Muani Ralte thu rawn thawh kha ka ngaihdan chiah a ni a, a taka ka tawn ve ni bawkin ka hria. Kan rama zalen taka zu an zawrh hi thil dangah chuan a that lohna ka hre em em pawh a ni lo; mahse, zu zawrhna dawr ni lo, dawr dang zawng zawng hi chu kan inhralh chhiat phah nasa ni chuan ka hria. Mi hian zu manah an pawisa hi an hmang zo ta vek mai emaw tih a awl khawp mai. Inhralh a har tak tak a ni. - 9774079049 Central YMA-in Gas chungchanga an hmalakna chu mipui tan a va han thlamuanthlak em! Chanchinbu vela kan lo hriat ve phak chinah mi pahnih khat duham leh sual avang mai maia ram mipui zawng zawngin kan tuar kha a tha lo hle mai. Tlawmngai pawlte thawh chhuah ngai lo hian sorkar thuneitu lam pawhin tan han la ve sauh sauh zel teh se. Department lamin escort-tu tur an tir tih pawh a thlamuanthlak a, an indaih lo nia an sawi pawh a awm tho mai. Mahse, tute emawin thil sual an tih avanga ram pum tawrhna ang chi hi chu thleng lo hram tawh teh se. - 9862357385 Gas chungchanga Central YMA hmalakna han hriat hian a thlamuanthlak hle mai. Mizoten hetiang pawl, mahni hamthatna tur ni lo, kan ram leh mipuite tana thawh duhna tak tak rilru pu kan nei hi kan vannei takzetin ka hria. - Ami Ralte Tunlai chu Khuangchera a lar hle mai. An buaina leh ngaihdan inan lohnate chu eng pawh lo ni ta sela, keia lo thlir vena atang chuan kan thangthar, Khuangchera chanchin ngaihsak lo leh hre tawh lo tam takten a chanchin an hriat thar phah leh an ngaihven thar leh phah hrim hrim hi a lawmawm ka lo ti ve khawp mai. An zirlai baka a hming an hriat ngai loh kha Mizo hnam tana thih thlenga tang a nihna chiang zawkin an hriat phah dawn niin ka hria a, heti zawng hian a lawmawm ve hrim hrim mai niin kei chuan ka lo hriat a ni. - Sangtea Tun hnai lawka Independence Day lawmnaah chhiatna a thleng a, nunna chân ta zirlai naupang kha ka lo khawngaih khawp mai. A hmain natna a lo nei lawk nge chu ka hre lo va, nunna hi chu a hlu em a, a chhungte pawh ka tawrhpui hle a ni. A lakah pawh sorkarin eng emaw tak an tih ngei ka lo beiseipui bawk e. - Maawma Khuangchera’n kan ram chu tunkar chu min chiah nasa hle mai, a mi nawlpui chuan India tana zalenna suala thi angah chuan kan pawm lo niin a lang a. Chutih laiin ka lo thlir venaah chuan chawimawi tumtute pawh hian an tisual bur lem lo chuan ka lo hria. Sap sipai rawn lut turte kha a theihtawpin a lo do let a, a hun laiin India hnuaia awm chu la ni lo mah ila India awp tumtute zinga mi a beih avanga chawimawi kha an ni maiin ka hria a, India zalenna sualtu han tih bur chu a rem lo a nih pawhin a hnua India awptu, British-te beitu kha chu a ni ve chiang mai. - Malawma Tunlai chu infiamna inkhawmpui lian ber, Olympic Games hun lai a ni a, India erawh a la ropui lo khawp mai. Keini aia ram tê zawk leh mihring tlem zawknaten medal an awrh chanchin kan hriaa kan hmuh deuh reng laiin heti zat mihring chenna hi kan la nep hle mai. Heti zat mihring awm zingah hi chuan talent nei tha deuh, khawvel huapa hriat hlawh tur hi kan awm ngang lo em maw ni dawn ni?! - 8794686442 Ram a zalena a ralmuan hi chuan sipaite hi an tangkai lo va, kan hmusit a, fiamthu thawh nan kan hmang mai mai thin. Zikpuii Pa khan sipai hi a ngaisak em em thin niin an sawi a, ram hrang hrangah awmin ram buai leh tharum thawhnaah an tangkaizia leh an thlamuanna tangkaizia a hmu a ni ngei ang. Kan ramah erawh hi chuan sipai hi kan ngaisang tehchiam lo niin ka hria a, anmahni behchhana fiamthu pawh a tam; mahse, kan hmuhsit chhan hi kan ram a ralmuan em vang a ni. Kan ram hi helin min runin min tibuai reng sela chuan sipaite hi kan thlamuanpui ang a, tun ang hian fiamthu thawh nan kan hmang mai maiin ka ring lo. Kan ram kan vanneihzia hi chhutin lawm nachang i hre thin ang u. - Zawma Taxi kan intlanchhawktir leh dawn ta a, mipui nawlpui tan chuan a lawmawm lam chu a ni a. Chutih rual chuan taxi hmanga chhungte chawm tan chuan phurrit a ni ngei ang. Taxi khalha ei zawngtute tan pawh buaina chu a awm phah ngei chuan ka ring. Chutih lai chuan heti tak maia nileng deuh thaka traffic jam-a tan reng mai ai chuan thawl deuh hleka tlan zung zung theih hi a hlawk zawk mai thei bawk. Kan ram khawpuiin a mamawh kawngpui thawl a awm theih nana intlanchhawk huap taxi pute an fakawm hrim hrim mai. - 8729805358