ZALEN August 4, 2026: Congress Thalai chuan Chief Minister Lalduhoma chuan dawihzep avanga mahni thusawi hrang hrang pawh amah bawkin hnial a, ILP leh Mizoram-in remna leh muanna a neih chungchang sawi nep zawng leh Mizoram inhung bikna thiah pawi ti lo zawnga a sawi duh lohna vawiin khan Vanapa hall kawtah an nei a. Chief Minister Lalduhoma chu mi dawihzep leh hruaitu lu ber ni tlak lova ngaiin 'Pawnfen' an fen tirna thlalak an pho chhuak.

Hemi hunah hian MPCC General Secretary Rosiamngheta chuan thusawiin, "Pu Lal Thanhawla leh a thawhpuiten Chief Minister leh Minister thuthleng Mizoram tana an ken avanga Remna leh muanna hi nei thei chauh kan ni a, hetianga tlanchhe chunga Mizoram remna leh muanna kan neih hi sawi bawrhban chi a ni lo," a ti. 

Rosiamngheta chuan, "Tunah kan inhung bikna ILP (Inner Line Permit) pawh hnam dang tana zuamawm thei tur ang berin keini aia tam leh hnam chak zawk te beng thleng turin a sawi chhuak hi Mizoram hi chimrala kan awmna turin min zuar tihna a ni. 

"Hetiang ram hruaitu dinna nghet nei lo, tum mumal nei lo leh hlauh ngah lutuk hi ram hruaitu lu ber ni tlak a ni lova, Pawnfen feng tlak a ni a, a hruaina hnuaiah hian Mizoram leh a chhunga cheng hnam hrang hrang leh kan sakhua hi dinhmun hlauhawm takah min dintir mek a. Mizoram him lohna atan hian mawh a phur a ni. A thusawi avang hian Mizoram mipui rilru thuk takin a hliam a, tunkar chhung ngei hian mipui hnenah a thusawi avanga ngaihdam dil turin Congress Thalai chuan a phut a ni," a ti bawk.