SAWHKHAWK of the day Minister leh MLA atanga kan Health Minister Pu Lal Thanzara banna thu te, Chief Minister Pu Lal Thanhawla leh MNYF lama an hotu lawk inbeihna thawmte hi chanchin mawi lo tak chu a ni ngei mai a, Kristian rama thleng atana duhawm loh tak chu a ni ngei mai a. An inbeih leh an thu kal zel chu nakinah a la lang dawn a, engpawh lo ni ta sela, he kan ram, politics tui nu leh thil tha lo hrang hrangin a chim chhiat mek siam thatna kawnga bul intanna ni hlauh sela ka va ti em! A thiam leh thiam lo, a dik leh dik lo lam chu tu pawh lo ni rawh se, chu chu ka ngaihven lo; mahse, he thil thleng hian kan ram politics hi a tha zawnga kal turin nawr chhuak hlauh sela, chu chu mipuite pawhin a thlen theih nan i bei ang u. - MkSiama Pu Chhuanliana huang hi chhut sual a awm leh zeuh thin a, thenkhat hi chu fimkhur loh vang leh chhiar nawn mumal loh vang liau liau tih hriat deuhte pawh hi a ni thin a, in fimkhur viau tawh lai hian tan han la lehzual teh u. - Mawimawii In chanchinbu a chhiar a manhla zel e. Hma in sawn zel niin ka lo hre ve ringawt a. A hmel lan mawina atana intih a nih ka ring deuh va; mahse, milem in dah dan hian a lan dan a tichiri deuh em tih ka lo ngaihtuah ve a. Kar hmasaa Sma ngaihdan rawn thawh kha ka ngaihdan chiah a ni, hei aia hmelmawi, mi hip deuh zawk hian in chhuah theih ngei ka ring e. - Sma Theihtawp chhuah zel teh u, in chanchinbu hi ngaihnawm kan tiin kan chhungkua chuan kan hlut teh mai a nia... An sawiselna cheuvah hian insiam that zel bawk ula. - Tuikual pa Tunlai harhna hi a lar bawk a, ka lo sawi ve. A bikin naupang deuh zawkte hi ka lo vei ve em em ringawt mai a. Hman zan lawk khan kan Kohhrana kum naupang lam, chang sang deuhte an kawmnaah chuan sikul kal te hi an sawi chhe lek lek mai tih thawmte ka lo hria a, an thlarau dawn phei chu va hriatpui ve vek lo mah ila, hetiang hi chu thil tha tak a ni ang em tih ka lo ngaihtuah ve mai mai a. Pathianin lehkha zir lova a rawngbawl tura a ko a nih chuan kan hriatpui phak chu a ni lo; mahse, thenkhat changsang, a bikin kum lama naupang deuh hi chu Kohhran leh thalai pawl hruaitute hian in vil ngun deuh chu a ngai khawpin ka hria. Pathian thu hi lak fuh loh chuan mi ang lova mi siam thei a ni a; chuvangin, kawng dika an kala dik taka Pathian thu an zawm theih nan tan han la zel teh u. - 8794686442 Tunlai chu Kan Chief Minister, a nau leh Pu K.Vanlalvena, Australia-a awm Matana Pachuau te chu tunlaia kan rama hming lar ber an ni mek awm e. An inbeihna leh an thiltihah hian tu nge dik, tu nge dik lo chu kan la hre chhawm zel dawn a. Heng mite hi an kalna kawng theuhvah chuan mi huaisen an ni theuh hian ka hre ve a, a eng emaw kawng zawng tak chuan an ngaihsanawm hlawm viauin ka lo hre ve mai mai. - Puia hawi lam neih chu a tha a; mahse, chanchin pheka chhuah ringawt te, sawi ringawt maite hi a tawk lo. Tin, thawhlawm thawh tha tura intih te, inkhawm thahnemngai tura sawi ringawtte pawh hi a tawk lo. KTP hruaitu te, Kohhran hruaitute hi an chet chhuah a ngai a ni zawk. Chuvangin, rinna hi thiltih tel lo chuan thi a ni zawk e. Kan hawi lam tura inkhawm kan ngaih pawimawh ang chiah hian thenawm khawveng inrem lohna te, rawngbawltu leh rawngbawltu inrem lohna te, Beram leh a pu inrem lohna te, thian leh thian inkara inrem lohna zawng zawngte pawh hi kan inrem theihna tur atana kan hawi lamte pawh ni tel ve se a tha ang. Eng emaw mai maiah hi chuan i inhambuai tawh lo teh ang u. Rawngbawltute u, in khandaih kha a hmanna turah hmang tawh teh u, in Jerusalem-ah khan Setana a pawng talh a nia. - Point Out Ni hnih khat ruah a sur deuh chuan kan ramah hian leimin avanga chhiatna hrang hrang a thleng nghal chum chum zel mai chu a nia, kan khawngaihthlak ngawt mai. Chhiat tawkte hi an khawngaihthlak khawp mai a, chutih rual chuan tam tak hi chu kan fimkhur loh leh kan inven lawk loh vang hi a ni thinin ka hria a. Tam tak hi chu inven theih ni hian ka lo hre ve a, sorkarin inven dan leh tuichhe paihna kaltir dan tur a sawi mai mai, ho mai mai leh kan ngaihthlak liam mai mai hi hetiang kan tawh chiah hian a lo tangkai tih a lang thin a. Mizote hian kan thatna tur hi chu zawm mai ang u, a harsa lo thin viau a nia. In kan sa huai lutukte pawh hi sim dan awm se kan chhiatna tawh hi a tlem deuh mai thei bawk e. - Mawimawia Mizoten hnam dang zinga rawng kan bawl dan hi kan Kohhran hruaitute hian ennawn se ka duh ngawt mai. Kan hnam tih dan khera Pathian biaktir kan tum hi Pathian hnena kan hruaina kawng min daltu niin ka hria. Keini aia hnam upa fe zawk an ni a, an hnam kalphung nena inmil tura Pathian biak kan zirtira kan hrilh hian a hlawk zawk ka ring tlat. A tir atanga khuang nena kan chumchilh nghal ngawt chuan anni chuan awlsam taka pawm mai harsa an tih ka ring. Ngaihtuahna sen tharna chi tak niin ka hria. - Muana Kohhran, YMA leh NGO?hrang hrangte hian sual hi kan huaa kan do dawn a nih chuan sual rah chhuah atanga do lovin leh do ngam bik nei lo hian a sual bulpui - ei rukna, duhamna, hlemhletna, mit châkna, nawmsipbawlna, awhna sual chi hrang hrangte hi a ler atangin leh a rah chhuah atanga kan do chuan kan tifuh dawn lo. Mi, a thawh chhuah leh a thil neih inmil lo lutuk kan hmuha kan hriat reng pawh kan hnualsuat ngam lo va, chu mai chu sawi loh, mi mal, pawl leh Kohhran angin kan biak that rawn a, a thawhlawm thawh thlahlelin Kohhran leh pawlah nihna kan pe mathlawn lo. Kan fate, naupang chhiaa kan ngaihten an lo hmu thiam vek tawh si a, Kohhran leh khawtlangah nun entawn tur an hmu si lo. Mi rethei thil tisual kan man ngam a, mi hausa thil sual ti erawh kan palzam thung si. Tin, Kohhran leh pawl hrang hrang ram rorelnaah kan inrawlh thukin kan kuang lo kan nawr nasa. - 8575155647