SAWHKHAWK of the day TUN HNAIA ASSAM NENA kan inrina lai bawra thawm awm leh hat kha kan hre theuhvin a rinawm a, helai vela buaina chhuak thin hi a nimawm ngawt mai, a tuartute pawh an khawngaihthlak zozai ta. Mizote hi tangrual a ngaih thu kan sawiin kan inhrilh fo va, phai vaiho laka kan tlemzia ziate hi thiam deuh deuhvin kan sawi a; tunah chuan a tak taka kan chet chhuah a hun tawh niin kei chuan ka ngai. Khu lai bawra thenawm vaiho huangtau lutuk khu Mizo tlangval hian tihtawp dan zawn a thain ka hria. Tharum chuan kan thei lo pawh a ni thei a; mahse, kan sorkar lama thuneitute hi na zawka che tur tal hian i nawr teh ang u. An fingin an tam si a, min chim hneh zel dawn niin a ngaih theih tlat a ni. Khu lai rama state pawna mite an rawn intihthu tawh loh nan leh eng eng emaw an rawn chawh chhuah tawh loh nana hmala tur hian sorkar hi nawr dan i thiam teh ang u. Tun hnai thil thleng bika sorkarin boruak a siam dan leh a chet dan kha ka fak bawk e. - Lawma pu Pathianni hmasaa Sawhkhawk of the Week kha tha ka ti kher mai. A rawn sawi ang khan Mizote hi thil reng rengah a hre hmasa, thil thlen dan kimchang hre hmasa leh thil thlenna hmun thleng hmasa ni châk awmkhawm hi kan ni deuh ringawt hian ka lo hre thin a. Khawvel thiamna lo sang zelin a ken tel a nih miah avangin kan hmanraw thate hi kan hnualsuat thiang lo va, hnualsuat ve ringawt mai ila awmzia a awm dawn chuang lo va; chuvangin, a hman dan kan thiam a ngai a, kan hmanruate a in-update chak ang bawkin a hmangtute pawh kan in-update ve zung zung a ngai a ni. A rawn sawi ang khan inzirtirna tha pawh kan inpeka kan inhrilh ngun a ngai khawp mai. A hmangtu zawng zawng hi lehkhathiam, bengvar, dan hria, pawi leh pawi lo chin thliar hrang thiam vek kan ni lo va, kan hmanruain a tihtheih ang chu tihtir pawp pawp ching kan tam hle a. Chuvang tak chuan a nachang hria leh sorkar thleng pawhin tunlai hmanraw changkang, a bikin kan inbiakpawhna ang chi hman dan leh hman thiam loh a pawizia min hrilhhriat tam a ngai hle a ni. - The Man, Aizawl Presbyterian Kohhran hnuaia Thalai Pawl intawhkhawmna pakhat, Pastor Bial Conference hman mek a ni a, he conference hi kumin chhunga KTP kal dan tur tam tak hriltu tur a ni leh dawn a, rorel pawh an uluk thin hle a ni. Presbyterian Kohhran hi inkhaidiat fel tak a nih angin KTP pawh hi khaidiat fel tak neih a ni a, he conference hian Central KTP, General Conference/Rorel Inkhawm thleng a nghawng phak leh dawn a. Conference hmangtu thalai zawng zawngte hlawk taka hmang turin ka chah cheu va, in rorelnaa thutlukna tam tak hi kan ram nghawng a ni leh dawn a, uluk tak leh fim taka rorel turin ka duh cheu a ni. He conference atang hian thil tha chhuak mawlh teh se! - Adika MNF Thalaihovin Zu hralh phalna copy an hal kha ka lo hmu ve a, “MNF thalaiho hi an felin an zingah zu in duh an awm miah lo a ni maw?” ka ti a. Ka bula mi chuan Congress, ZNP leh PC thalaiho ang thovin MNF thalai zingah a tam zawk chu zu in ve duh tho an nih thu min hrilh. Engati nge lem hi an chan reng mai aw ka ti. Duh chu duh, duh lo chu duh lo ni mai rawh se. A reng thuah party dang tih ngam loh zu khap hi Congress tih a nih angin thlak danglam emaw, siam that emaw hi Congress sorkar tih tur dik tak a ni. Party dang tan lo iak lo iak vena tur a awm lo. - Matea pu Ka hming avangin hnam zawng zawng huat in ni ang (Bible). Ringtu kan nih hian mi huat kan ni tih hi pawm mai ila a hahdamthlak mai. A hranpaa mi huatthu kan va sawi kher a ngai lo va, “Mi huatthu kan sawi em lo vang chu maw?” kan ti thlazen hi chu a fuh lo deuh chuan ka hria. Chutia ka sawi avang chuan mi huatthu ka va sawi tur tihna erawh chu a ni lo, tuma huatthu sawi lo mah la, ram leh khawtlang tana mi tha tawpkhawp pawh ni mah la, ringtu kan nih avang ngawt pawh hian hnam zawk zawng huat kan ni tih hi aw ring mnai rawh, aw ring mai rawh! - 9402520257 Zu Inho hi ram tithuanawmptute ni lovin, sum ngaina leh duham thang huamho, hmasawnna tur sum mahni tana paipawn chingte hi an nih zawk ka ring ve tlat. Zu hi tha ka tihna erawh a ni lo. - 9612221332 Zu in ngai lovin zu an do hneh ngai lo va, zu in miin an do hneh zawk thin. A chhan chu zu in mi chuan zu cheng a hria a, ha nei si lovin a seh nat dante a hria a. A tawpah an in-control-in an in tlem tawlh tawlh a, an ngheiin Pathian an bel leh nge nge thin zawk a ni. Khitianga tih nachang hre lo chu an liam phak phak mai reng a ni zawk, lo dawn ve teh! - Suaka, azl. MNF-in Mipui thlavang hauh nan kawng an zawh kha a tha ka lo ti ve mai mai khawp mai a. Politics hre lo tak, sorkar inrelbawl dan pawh hre tam lo tak ni mah ila, kan sorkar hrawn mek hi chuan mi rethei hi min ti-VIP ta chiah lo em ni aw tih chang ka nei ve ta fo mai. Kum 4 vel kan la hrawn ngei dawn niin a ngaih theih a, an hmabaka an chet zel dan tur chu mi rethei tan chuan suangtuah lawk ngam pawh a ni lo hialin ka hria. - Gunner Hmar Mi khirh tak leh zahna chang hre lo, sual Setana hi a huangtau em em a, chhungkua, khawtlang, mi mal nun tihchhiat vek hi a hnapui ber leh a tum lian ber a ni. Inhmuhsitna, inrem lohna thlentirtu pawh he sual Setana bawk hi a ni a; duhamna sual bawiha min hruai luttu tur pawh he sual Setana bawk hi a ni. Mahse, ringtute kan vanneih em emna chu he sual Setana hian kan nun a tibuai ve phak lo va; tin, khawvel tawp thleng pawh hian min thunun thei dawn lo bawk a ni. - 8415052704 Sumah miin a rilru zawng zawng a pek chuan mi hmantlak a ni ngai lo. Kan dam chhung khawsakna atan hian sum chu pawimawh tak a ni a; nimahsela, sum ringawtah miin a rilru a pek chuan chhungkua pawh a vawng fel thei lo va, chhungkua chuan harsatna leh buaina a tawng ngei ngei a ni. Chunakah Pathian aia sum kan lo hmachhuan zawk chuan a fuh thei lo va, chhungkua a thlahthlam a, ama chungah pawh chhungkua a vui bawk thin. Amah Pathian lovin a thilsiam kan lo Pathian hian pawi tak a ni. Sum pawh hi Pathian avanga awm chauh a ni tih kan hriat a tul hle. Chuvang chuan chhungkua i vawng him tawkin i inhria em tih lo inzawt teh. Taksa bawrhsawmna han tawk ta chiah la, i sum kha ip pawpa thlak ang hlauhvin a ral hiau hiau mai ang. Chutah chuan sumin a chhan zawh lohzia che chu i hre mai ang. Pathianin i damdawi ei thinte kha mal a sawm loh chuan i tan thihna turah a chang thei bawk. - The Slam