SAWHKHAWK of the day Krismas leh Kum thar vuakvet hlim taka thenkhatin kan hman theih laiin chhiatna hrang hrang a thleng a, nunna chân hial pawh an awm a, a tuartute pawi ka tihpui takzet hlawm. Hetih rual hetiang boruaka khawpui lun laia chetsualna (a bikin lirthei) thleng hi a tam zawk chu hawklak leh nun pawlawh vang a ni duhin ka hria (a chesual zawng zawngte an ni vek tihna ni lovin). Tuna chetsualna thlenga mite pawh Krismas leh Kum thar boruak zo lo, ni dang (kum laklawh)-a an awm dan aia uchuaka khawsa tam tak an awm ka ring. Hetiang hunpuiah hian kan Kristianna hi lang chhuak thin se a duhawm hle a, ‘HUNPUI’ zo lo Kristian mai ni lovin, ‘DANGLAM?NGAI?LO’ Kristian ni turin he kum tharah hian i inhlan thar theuh ang u. - Sawi mai mai thin-a ZALEN chhiartu zawng zawngte Kumthar chibai vek ule! Krismas leh Kumthar lawmna nuam taka in hman ka beisei vek bawk e. He kum thar hi Zalen chanchinbu chhiartu zawng zawng tan kum malsawm lo ni theuh turin duhsakna ka hlan vek a che u!! - Zomuana He Kum tharah hian zalen chhiartu zawng zawngten nikum lama kan tih thin tha lote simin a tha zawngin hmasawn theuh tum ila, kan tan kum tha lo ni theuh rawh se! Zalen enkawltute pawh tluang taka an hna an thawh theih nan duhsakna ka hlan bawk e. - Fakpuii Lal Isua hmangaihna angchhung nuama kan chen ve theih nan hian hrehawm tam tak hi kan tawrh ve a tul a. Kraws kawng kan zawh mekna kawng hi kawng nuam leh awlsam a ni lo a ni. Sual lak ata hring fate min tlan chhuah nan Pathian chuan a fapa mal neih chhun Lal Isua min pe a, hrehawm tinreng tuarin Krawsah khenbehin a awm a, Krawsa Lal Isuan a tawrhnate kan hriat a, tawmpuitu kan nih ve avang chuan ringtu kan niha Lal Isua kan zuina kawngah hian hrehawm tam tak hi kan tawrh ve hi a ngai tlat a ni. - 9402520257 Aizawl kawtthler cheitute veng an fakawm e. Chutih rualin chei nalh/mawi vengte hnena lawmman hlantute pawh an fakawm a, lawmman semnaa ‘Aizawl khawpui pawhin Krismas a hmang ve a ni,’ tih phei kha chu a dik khawpin ka hria. Ram dangah pawh (a bikin Kristian leh ram hausaah) he hunpui hi an hmang uar thinin an kawtlai, in leh hmun pawimawh leh langsar deuh chu an chei nasa hle thin a. A tha zawng hi chu hnam dang/ram dang tih pawh ni se copy hreh loh hi a fuh zawk a, kan copy fuh hlein ka hria. I uar deuh deuh teh ang u. - Sangsanga Krismas leh Kum thar vuakveta kum dangah pawh an lo tih tawh thin, kan bazar kawngpui lun laia lirthei kal theih lohna tur hunbi an siam hi a tha hle mai a, kum dangah pawh chin chhunzawm zel chi niin a lang. Kuminah khan kum danga kawngpui dunga inpho (thil zuar) an awm tuarh ang chi kha an phal vak lo niin ka hria a, khatiang kha a that em em rualin lirthei kal phal loh a nih chhung kha chuan mipui kalna tibuai lo tawka kawngpuia inzawrh kha phal mai a tha lo maw ka lo ti ve mai mai a. A chhan chu bazarpuiah vekah thil zuarte an inhnawh a, bazarpuia kan tawt em em kha kawngpui dan khan a tihziaawm phah miah lo niin ka ngai a; chuvangin, kawngpui dung remchanga inzawrh phal deuh mai khan a chhung tawt lutuk tur a tihziaawm dawn avangin lirthei dan chhung kha chu phalsak mai a fuh ang em? - Tawttia Veng cheimawi hi a tha a, kawtlai a tieng a, a hmuhnawm a, thlir leh tlawh pawh a hlawh viau mai a, a ti-Krismas em em bawk. Chubakah chuan hmun lun laia hunpuia buaina chhuak tur pawh a ven deuh ka ring bawk. Chutih rual chuan veng cheimawi mai mai lawmmana pawisa tam tham tak mai sen kha a uiawm angreng ka lo tia, a chei hun chhung a rei em em bawk si lo va, sum a kal ral hnem mah mah em ka lo ti ve mai mai. - No. thup Aizawl khawpui tlak lam deuhva awm kan ni a, in vengah a ni ve em ka hre lo va. Kum hlui thlah zanah khan halpuah leh halmawi hal a tam khawpin ka lo hmu. Kuminah hian kum dang ang bawkin khap leh tho niin ka lo hria a, kum hnih kalta velah kha chuan khapna a khauh deuh a ni mai thei a, a ri miah lo (halna hmun bik siam lovah chuan) tih theih kha niin ka hria a, kuminah erawh kha chuan kan veng bakah kan veng atanga hmuh theih/thawm hriat phakah chuan a ri nasain a êng nasa chuai chuai hlein ka lo hmu. In ni ve em? - Nunmawia Ka ZALEN chhiarpui thin zawng zawngte Kum thar chibai tha ber ka buk vek a che u. Kuminah pawh he chanchinbu hmang hian inkawmin inpawh tlang lehzual ang u aw... - Lal Zalen-i KUm a thar leh ta a, Zalen chhiartute pawh chibai ule! Kan chanchinbu enkawltute pawh nun thar nen, tha thar nen an tang thar turah ngai ila, thu ngaihnawm zawk leh chhut dik zawk pawh min hlui thei turah ngai ila, theihtawpin lo tang zel teh se. - Army ‘Nawn, nawn, Nawn’ tih reng mai. Thlarau programme a nih chuan a tha e, vawi hnih khat nawn chu pawi pawh ka ti lo va, a reng thu-ah nawn hi eng nge a tulna ni ang aw? Thlaraua bul tana tisaa zawh in tum en ni ang tih chauhte kha a ni mai lo’ng maw?!! Chawimawi tihte pawh a eng ber hi nge an chawimawi ni ang le? Pathian nge an chawimawia anmahni leh anmahni inrem thei lo hi nge an chawimawi ang le tih hi ngaihtuah tham a tling a ni. Lam mup mup pawh hi a ni ber lem lo, hnial hrat em em pawh a ni chuang lo, inrem hi a pawimawh zawk. Vana mi Pathian chawimawi si lo te, vana Pathian nawn chhan chuang si lote hian Tlawng dunga mi ramhuai hi in lo nawn chhan lek hi a ni mai lo’ng maw? In zingah khan Setana a awm ve a, a nui vur vur a nia. Kraws thleng lova nun chânten chhandam an hlawh lo a ni zawk e. - Point Out ‘Kum tharah nun thar’ tih thupuia hmangin kum bul hmang theuh ang u aw... Sorkar tharin min hruai tan dawn a, kum lo thar mek nen hian a hmaa an kal dan aia tha zawk, rintlak leh innghahngamna sorkar thar ni hlauh teh se. A hmaa min hruai dan kha a chhe hlawm tawp e tihna lam ni lovin, kha aia tha zawk khan he ram, Mizote ram hi an hruai thei tih a chiang a, an MLA neih zat leh an MLA-te atang pawhin a hriat a; chuvangin, he ram hruai tura hneh taka mipuiten kan thlan lal leh an nih ang ngeiin a tha zawnga hneh takin min han hruai teh se. Kum thar leh sorkar tharah hian rilru thar han pu hlauh teh se. - Moijuala