Kan insawn a, kan awmna thar, Dinthar Transport mualah hian semtu an awm ve si lo va, KA HUANG leh SAWHKHAWK hi ka lak chhan a ni sia, min pui thei em? Khawngaih takin. - 9615488519 Kan ram hi a va ngaihtuahawm tak em, hmangaihtu dik tak kan va mamawh tak em!! Tuna sorkar hruaitute lah motor thar leia intihropui mai mai an ni si a, zu chhiah laka NLUP pawisa ba rulh nana hman tum an ni bawk si. Mipui hmangaihna chhete mah an nei lo. Contractor ni lo, party mi contract hna thawhtira hna chhe tak taka thawhtir thin an ni bawk. Update lo lutuk vek ram hruaitu neih hi a pawi a ni. - RAMHMANGAIHA RALTE Synod puipate (Ropui in intih hmel) heti taka ZU in do a nih chuan in Upate hian Thawhlawm Ip hi rawn dah ve ziah lo se a inhmeh deuh lo maw? - Anti-Synod Tunah chuan Zalen taka zu leh leh in i duh avangin zu an thlah zalen tur hi i nghakhlel a, i tem chak a ni thei. I dawntawi luat vanga i chhungkua leh i tu leh faten zu vanga buaina an tawh hun hunah chuan i thil fak hlawrh hlawrh hi maw, i hmelma lian ber leh i huat ber a ni tawh ang. Inchhirin a sawt tawh lo’ng!! Hremhmun lamtluang an zawh lai chu rilru na takin i la thlir vawng vawng dawn a ni. - 9612598771 Zu chungchang avanga Kohhran dem vak vakho hi inenfiah deuh teh u, Kohhrana mi tangkai tak in nih loh hmel! Zu in fa leh zu zuar fa nih in duh em? Lo inzawt teh u. - 9856950562 Mumang ram ni lo, THA nia hriat kaltlangpui ngam ram hruaitu Mizoramin kan nei hi kan va han vannei em!! An chungah lawmthu ka sawi mawlh mawlh e. - 9862383015 Tunlai ka rilru tibuaitu chu zu ni lovin kan thlai ei hi a ni tlat mai. Sa ei tam aiin thlai ei tam a that zawkzia kan sawi mek lai hian kan thlai eite hi taksa tan a hlauhawm thei mai ang em? Kan thiante Tahan han zin chuan henglaia dawnfawh an zawrh ang, thlum tak takte hi an ei duh miah lo an ti. A chhan chu a tihthlum nan eng emaw an telh thin a lo ni. Phai lam atanga thlai, duhawm hmel pui puite hi a enkawltute chuan an ei duh miah lo an ti bawk. An ei tur chu a chinna hmun hran an nei an ti lehzel. Hman nia kan thenawmte bean lei, itawm em em pawh DDT rim a nam nasa an ti. Kan rama hlauhawm lo an tih DDT hi sorkar ropui ber USA chuan a hlau em em thung. Chuvangin, kan thlai eite hi enfiah theih atan a va tha em!! - Matea pu Buhfai indaih lohna sutkian dan tha ber chu tam tak chawkluh hi a ni a; mahse, sum indaih lohna avangin chu chu a theih si loh. Chuvangin, kan neihchhun ren mai hi a finthlak. State dangin an tih angin sorkar hian kan mi hausate hi rethei zawkten ration an dawn tam theih nan pe lo ngam se a ropui hle ang. Vawk chaw atan bak an hmang si lo va. - M2 Kum 30 dawn a kal ta. Khang hun lai khan intipiangthar tha, zuk leh hmuam, ruihtheihthila fihlim, mite pawhin fel min tih leh fel inti tak ka ni thin a. Ka in leh a chhehvelah ruihtheihthil zawrh/awm ka phal lo va, ka in luahte pawh ka hrilh bawk a. Vantlang hriat ngei turin ring deuh deuhva ka sawi thin bakah chanchinbuah te ka chhuahtir vel thul, miin fel min ti se tih vang lekin. Rei pawh a ni lo, ti khawpa fel inti si, ka fate chu kan venga ruihtheihthil ti nasa an lo ni reng mai tih ka’n hriat chhuah meuh chuan ka zakin hnar a va lian tehreng em!! Chapo leh intifel em ema vantlang hriat tura au au ve lo fate erawh an fihlim tlat lawi si. Mahni fate pawh thunun thei lo, mi hmuha fel ka lo tum em em kha mite nuihsawh leh hmuhsit bak ka hlawh lo tih tunah hian ka hre chauh. Hetiang thil hi tunlai khawvel changkang tawhah tumah an tih duh ka ring tawh lo. A ramhlui zia tawh tlat. - 9856835945 Bazar thlaihnah zuarho hi Mizo an ni lo emaw ni leh? Khati zawnga kawhmawh bawl tur khan tinge zirtir aw? Tuman hriattirna kan dawng lo ve, chanchinbu leh TV kan chhiar, kan hmu a, kan ram tan kan zawm ve mai a ni. Ching tawh suh se. - KCA AMC awm tha hle hle politics tuinu avanga tihdanglam kan tum ringawt mai hi chu a va ropui lem lo em! Hetiang politics tha lo hi i kalsan ngam tawh ang u khai! - 8575321003 Kan dam chhung hian Pathian thutak chu kan sawi tur a ni si a. PATHIAN thutak lo hi chuan thinlung lairil a fan tak tak thei lo va, vawiinah hian engin nge min titlei a, eng nge kan tleipui ber hlawm le? Reilo te atana nawmna nge kan thlakhlelh a, kumkhua chatuan pawha chuai ve ngai lo tur leh kumkhaw nawmna tur zawk le? He khawvel hi zawng reilo teah a ral thuai dawn, rei a rial tawh dawn si lo; inpeih lote inpeih a hun tawh takzet zet a ni. Ropui takin Lal Isua a lo kal hunah hlim tak leh lawm taka tawk thei theuh turin i inbuatsaih sauh sauh zawk ang u. - 8415052704 Tun lai hian Zawlnei Jeremia 23:15 thu, 'Ram pumah Pathian pawisak lohna a chhuak' tih thu kha a thleng dik mek niin a lang. Ram hruaitu lu ber leh amah tantute chuan chal hnawihsen pawi an ti lo va, coconut sawhkeh pawh pawi an ti hek lo. Bible-in 'sual tinreng bul' ti hiala a sawi zu zawrh phalna pek tum mek tantuten Pathian Kohhran an sawichhiat phah ta. Kohhran hruaitute aw ai chuan ram hruaitute aw ngai pawimawh zawktu kan thahnem ta hle a, ram hruaitute leh anmahni tantuten mipui hmaah Kohhran demna thu hial an sawi chhuak ta fo va, ziakin an theh darh mek bawk a. Kum 1987-88 laia Kohhran aw pawisa lo ram hruaitute leh anmahni tantute kha mak takin an tlusawp a. Tuna ram hruaitute ni mekte erawh hi chuan Pathian hnena an tawngtai thu an sawi a, an tawngtai dan leh Kohhranho tawngtai dan erawh a inang lo niin a lang thung. Hemi thuah hian engkim hre thu Pathian rorelna a lo la lan ngei kei chuan ka ring. - Omoma Pu Sumah miin a rilru zawng zawng a pek chuan mi hmantlak a ni ngai lo. Kan dam chhung khawsakna atan hian sum chu pawimawh tak a ni a; nimahsela, sum ringawtah miin a rilru a pek chuan chhungkua pawh a vawng fel thei lo va, chhungkua chuan harsatna leh buaina a tawng ngei ngei a ni. Chunakah Pathian aia sum kan lo hmachhuan zawk chuan a fuh thei lo va, chhungkua a thlahthlam a, ama chungah pawh chhungkua a vui bawk thin. Amah Pathian lovin a thilsiam kan lo Pathian hian pawi tak a ni. Sum pawh hi Pathian avanga awm chauh a ni tih kan hriat a tul hle. Chuvang chuan chhungkua i vawng him tawkin i inhria em tih lo inzawt teh. Taksa bawrhsawmna han tawk ta chiah la, i sum kha ip pawpa thlak ang hlauhvin a ral hiau hiau mai ang. Chutah chuan sumin a chhan zawh lohzia che chu i hre mai ang. Pathianin i damdawi ei thinte kha mal a sawm loh chuan i tan thihna turah a chang thei bawk. - The Slam SAWHKHAWK OF THE DAY Chanchinbuah hian mithiam leh fing tak tak hian ram leh hnam tana tha tur hi an rawn ziak thin a, kan sorkara Minister, MLA te hian an chhiar ngai lo em ni aw? Tun hnaiah khan Sri Lanka development Pu Lalkiamlova ziakte kha zawm ve atan a tha khawp mai. Zoram hruaitute hian an ti thei vein ka hria. Ram hmangaihtu hruaitu neih ve a chakawm tawh ngei mai, mipui lam pawh hi i harh teh ang u. - 9856836216