Puja-na ilo vela chak kan zuk hnawih sen vel thin kha BJP kan lo mawngzawm ru reng tawh zawk a lo ni lo maw? Central sorkar inthlak hnua CM tawngkam hman duh dan atang hian. - No. thup Chal hnawih sen (Tilak) hi Hindu sakhaw betute tih makmawh a ni a, an kutpui - Diwali, puja-ah te malsawmna dawnna anga ngaiin an hnawih thin. Tilak hi mit leh mit inkarah hnawih a ni a, mit pathumna anga ngaih a ni. Tichuan, mit pathum a han men khan kan nun kal taa sualna zawng zawng tirehtu anga ngaih a ni. Kan CM zahawm tak hi Hindu-ah a lo inlet reng tawh pawh a ni mai thei! La hnawih sen zel a tum ni awm tak khan a la tawng chhuak leh ta nghal a, Mizo mipui Kristian, a thlangtute zahna chhete pawh zuk han nei lo va! Mahse, tunah zawng a pi leh pute an sorkar tawh lo bawk a, a tawngkamte pawh a hriam tawh lo deuh turah i lo ngai chhin ang u. NLUP lah PM package atanga kan dawn liau liau a ti sia, tunah zawng PM hlui a hlauh, Pathian ang hiala a biak tlawn em em lah tlawn chhan tur a awm tawh lo bawk a, a chal pawh a hnawih sen tawh lo turah i ngai ang u! - LALTHADUHA Mizo zingah hian nuetral tak tak an awm lo emaw ka lo ti thin a, Pu Hawla, CM hi a lo nuetral ber a nih hi... - 9612762560 Pu ZOrama hi central lama BJP an sorkar tak avang hian he laiah lawmin tlaktlum lo tum ngawt lo se a tha ang - chal an hnawih sen khalh daih tawh kha... - No. thup MZP-ten Zofate Chawlhbuk sak an tumna hmuna MZP signboard tar lak thlak phuta Chakma NGO-ten by-election hial boycott-a lungawi lohna an lantir hi Mizoram laka helna dik tak a ni a. Sorkar pawh hian a hai ka ring lo. Kan ram humhalha sorkar inrawlhna ni awm tak a nih laiin kan sorkar a la ngawi tlat mai hi a mak ka ti a, tih loh sual lian tak hi hriatthiam harsa ka ti takzet a ni. Chuvangin chinghne beram vun sin inhlawhfa berampu nen eng nge an danglamna ka ti a nih pawhin min dem lul suh u. A mak thin em a ni! - Maenga BVT Pulpit tlang atanga thu sawi pha chinin thu an sawinaah mi dangte tai rana thu an sawi thin sim se a tha ngawt mai. In nunah hmuh tur a awm der si lo, Pathian thu sawi tur chuan mahni mi dangte aia ka indah hniam a ngai. Tichuan, mi dangin ka thu sawi an ei thei ang, chutiang bawkin Pathian aw hre tur chuan kan khawvel thilte ka herh hniam a ngai. - Lalthaa Rilrua awm leh vei zawngte sawi theia kan la dam ngawt pawh hi malsawmna nasa tak kan dawnte a lo ni reng mai. Thahnemngaih luat vanga sawiah min lo ngaihsak mai dawn nia. Mi tin mai hian he hun kan chhiar dan darkar 24 hi kan nei theuh va, aia tlem emaw, aia tam emaw zawk nei kan awm lo tih chu tlang hriat a ni. Ka sawi duh lai tak chu Pathian biak inkhawm thin, darkar khat emaw lek hi rei kan tiin kan ning hman dawn dawn anga lang hi ka lo vei ve em em a, ringtu kan ni kan inti ve si a nih chuan Pathian thusawi ngaihthlak te, inkhawm te kan peih em em tur hi a ni zawk a. Phur tak leh hlim leh lawm takin Pathian kan fak tlang ang a, Pathian kan fakna turah hian tlai mah var ila kan ning chuang lo'ng nge kan ti ve zawk dawn nia. - 8415052704 Mizo mipuite hian NLUP dawn duh vangin Congress hneh takin term hnih kan sorkartir mek a. An sum sem kan hmuh theih dawn phawt chuan an tihdan apiang kan sawisel ngam lo niin a lang a. Mipuiin sum hmuh kan duh hre rengin sorkar a huangtau ta hle a nih hi. Kohhran leh mipui rawn lovin zu zawrh an tum thu ualau taka an sawi tawh chu an thup leh a. India ram pum hman tur Food Security chu Mizorama hman chi ni lovin an sawi a, gas harsatna chu company leh sumdawngte inkara chin fel tur tiin mipui chu kut min silsan a. Selam khuaa nunaute ral beihin an bei a, central-a hotute tlak rualin a chhe thei ang berin an sawisel zui a. Sum harsat thu an sawi nasat tehlul nen, anmahni nawmchen nana hman atan sum awm thei ang apiang hman an ui leh si lo. Hetiang taka an chet vel ngam chhan hi Mizo mipuiin an lakah sum kan beisei avangin kan thlang lal tlat alawm. Kum nga chhung atana kan thlan lal Pu Hawla ho hi an tha emaw, tha lo emaw hrawn hrim hrim turah i ngai nghet tlat ang u. Pu Hawla sorkar hi Mizote min hrem tur emawa Pathian ruat an ni mai thei asin. - Omoma pu Tukin chu Chawlhni tuk a ni bawk a, Bible-a kan chhiar thin, siam thata ka duh tlem sawi ila, a bung leh chang tilang lo mai ang. An hmingah a ko theuh a tih hi hmingin tih ni zawk se, Khawvel zawng zawngah kal ula tih hi khawvel pum puiah ti zawk ila. Heng puanvar sinte hi.... tiin mi biaa tih hi mi zawt a tih ni se. An mit ata mittui zawng zawng a hru hul tawh ang ti lovin, a hru fai tawh ang tih ni bawk se. Hla thu pakhat, chuvangin ka khawvel thiante ka thlah ta, anni pawh muan loh ka duh tih hi an tihdanglam ang hi chuan ka sa thei ngang lo. A ngai hian thlak leh se, duhtu in tam ve ngawt ka ring. Hla hi a phuahtu phalna lova lo tihdanglam hi curruption nasa takah ka ngai. Tin, hla hi siam lova ohuah zawk tur a ni. - Matea pu Ceeke bamboo-in kuang 250 cheng nuai 165-in an siam dawn chuan kluang pakhat hi cheng nuai ruk leh singriat man a ni dawn a, a va duhsak awm bik ve aw.. - 9862176268 SAWHKHAWK of the day A va mak em! tih mai lo chu Zoram mipuite hian sawi tur kan nei ta lo a nih ber hi maw! Kum nga pawh tling mang lovah an motor la tha em em mai chu an iai a, mipuite erawh kum 15 atan tax min pek luihtir lawi sia. An flagship programme ber, NLUP lah chu an phurpui peih tawh mang bawk si lo. Gas ni se sorkar mawhphurhna a ni lo an ti leh bawk si. Mi retheiten ration man tlawma an lak ve theihna tur FS Bill leh Zoramah chuan kan hmang ve thei lo vang an ti leh tlat bawk a. Hetiang mi, mahni hamthatna tur rinawt thlir thiam, kan Zoram hruaitu atana kan thlang tling leh ta hi chu a va lungchhiatthlak tak em! Zoram hmalam hun saw a va thim kher ve le! - Lazara Azl.