SAWHKHAWK of the day He Mizoram, Kristian ramah hian Mizo Kristiante heti tak maia inhmangaih tawnna kan tlachham ta leh mahni hma kan sial em em ta hi eng nge maw awmzia ni ta le? Dawt sawi hreh miah lova motor kan lei vangte hi a ni mai lo maw? Motor dahna in (garage) ka nei ti veka motor lei kan ni awm si a, Aizawl leh khawpui hrang hranga kawngpui dung hi kan motor dahna in a ni si a. Engtin nge he Kristian ramah hian rorelna dik a awm theih tak ang le? Tun sorkar kan hrawn mek hi tute vanga sorkar nge ni? Mizo mipuite vang a ni lo’m ni? Tute nge a mawhphur ta ang le? MNF kan sorkartir leh a nih pawhin mipuite i phun i phun tawh lo hram ang u. Keimahni vote hlu tak avanga tling an ni thin si a. Mi duham leh pamhamin mi duham leh pamham, dawt sawi hreh loho kan in-vote tling tawn vel mai mai a ni e. Kohhran Pathian khawpuia roreltute lah chu he leiah nuamsa bawk, vanah nuamsa bawkin an awm hmel si a. - Tea, Azl. Hlua khiangte, Venghnuai pa thuziak kha ka lo chhiar a, a va tha em! A ni tak a, kan police leh excise-te hian an vil hneh hauh dawn lo mai le! Buaina tam tak chu a la awm chho zut dawn a; mahse, a zamawm dawn em ni? Ram tina kala thil siam zawng zawng hnena chanchin tha hril tur kan ni alawm, Pastor leh rawngbawltuten hma an hruai ang a, chuti lam hawi chuan kan kal mai dawn lo’m ni? Nge, chuti ni lovin, mihring lama nalh thei ang berin kan chawlhni leh zawk ang le? - Rina Ralte, BVT Zalen chanchinbu hi a chhiar a manhlain a ngaihnawm thei khawp mai a, in chanchinbu rem dan pawh hmuh nuam pawl tak niin ka hria. Chutih rual chuan phek hma lam bikah hian Mizo tawng dik chiah lo, inzawm tur inzawm lo leh inzawm lo tur inzawm tlat lawi si ang chi hi a awm leh zauh zauh thinin ka lo hre ve a. A thiam leh hre ber chu ka ni miah lo va, mi tlanglawn deuh pawhin kan hriat awm takah tihsual (zawm loh tur zawm ang chi) a awm a, naupang thlenga chhiar kan tam avang hian in fimkhur a, in uluk deuh theih chuan a lawmawm hle ang. Chhut sual pawh an sawi zing bawk a, a tlem sawt viau ka ti ve tlat. - Sma Zalen, in chanchinbu hi chhiar a nuam thin khawp mai, ka lo chhiar kim thlap thin bawk. Tin, Pu Marema pawh a felin biak a nuam ka ti hle bawk. - C.Lalrintluanga, Electric Veng, Aizawl Hmeichhia chuan thu awih tlatin ngawi rengin zir rawh se. Amaherawhchu, hmeichhiain zirtir zawng ka phal lo, mipa chunga thuneih ka phal hek lo, ngawi rengin awm zawk rawh se (Bible), Pathian thu a ni. Hriatna tura beng nei chuan hre rawh se, mihring thu a ni lo tih hi. Eng mi pwh nise, mipate zah thiam nih hi ringtute awm dan tur dik tak chu a ni. Tlawma lak chu a ni lo, mipa kan nih avanga anawm amaka hmeichhiate chunga inlulin erawh kan tih loh tawp tur a ni. Hmangaih a, lungruala cheng za tur kan ni zawk e. - Hruaitea Zoram mipuite “Kutdawh hnam” ti chung zela kum 20 min lo hruai a, kutdawh mipuit emin rawk leh chiam lawi si hi hriat thiam a har hlein ka hria. Hruaitu tha chuan a rawngbawlsak mipuite zangkhaina leh hmasawnna a thlen thin. Hetiang ram hruaitu kam tam leh hausa chak lutukte hi mipuiten hnawl nachang hria ila, Pu Duhoma policy, kalphung thar ngei hi he kan ram neihchhun, Mizoramah hian i tungdung ang u. - Jonathana Pu Mizo kan ni, kan hmel a tha, kan tum a sang bawk si. Ni e, ni e, kan hmeltha mah mah, facebook profile atangte hian kan hre vek hlawm ang chu. Kan thiante ngei ngei pawh kan hai lek lek a nih tak hi! Bumna khawvel, kan Zoram chhungah hian kan Pa Pathian hian eng rilru nge min putsan tak ang le? A thei deuhvin kan ei ru a, a fel intiten kan sawisel a, hmalak tuma ke pen ngam lah tumah kan awm leh si lo. Nge, mahni hma kan sial hlawm lutuk zawk ni? Kan thatchhe zawk pawh a ni mai thei zawk asin, hnam dang kut hnathawk kan khawi hnem ta em mai. Kan tum a san lutukna lamah hian kan tlakna a sang viau ang tih chu ka hlau ve ta lo ve, mahni tum tawk hniam teah hian lungawi zel tang e. - Keimah Hlua Khiangte, Venghnuai Pa Kan ram hruaituiten chhiah leh bill hrang hranga mipuite hnena a lak duh dan hi a va mak tak em! Aizawl khawpui atangin keini mi retheiho hi min umchhuah an tum ta em ni? Tui bill, electric bill, lei man a let tam takin a pung a, Biak In leh vantlang hmun atangin chhiah tam tak lak an la tum zel bawk, sawi vek sen a ni lo, a rapthlak a ni tawp! Department hotute pawh hian Minister-te duh ang hian ruahmanna an lo siam mai em ni? Hetiang hrim hrim chuan hausa leh nei nung lo tan chuan Aizawl khawpuia khawsak a ngamawm loh ta hial mai. Minister leh department hotute khan lo chhut ve teh u, mi retheite hi hre rengin thutlukna siam teh u. Dam pawh a chakawm tawh loh em mai, intirapthlak em mai! - Aijal tlangval senior Hmanni lawka Assam police leh forest miten kan ram, Buhchangphai Ramthar zauva leilet min rawn chuhpuia khatiang issue liantham lutuk, a haia hai der rual loh thil thlenga tawng awm taka ngaih Home Minister emaw, Chief Minister emaw tun thlenga an la tawng chhuak miah lo mai hi mak ka ti a, dem loh chu a har ka ti khawp mai. Chutih ruala lawmna em em ka neih chu ramri chungchanga Joint Action Committee (JAC) an ding hi a nia, anni hian kan ramri chungchang pawh thui tak an rawn chhui chho hi ka lawm tak zet a, an tha tichak turin Mizoram mipui zawng zawng ka sawm takzet a che u. - Maeng, BVT Zu in ngai lovin zu an do hneh ngai lo va, zu in miin an do hneh zawk thin. A chhan chu zu in mi chuan zu cheng a hria a, ha nei si lovin a seh nat dante a hria a. A tawpah an in-control-in an in tlem tawlh tawlh a, an ngheiin Pathian an bel leh nge nge thin zawk a ni. Khitianga tih nachang hre lo chu an liam phak phak mai reng a ni zawk, lo dawn ve teh! - Suaka, azl. Mizorama Rawngbawlna lama thalai pawl lian ber, Kristian Thalai Pawl chuan Mission Veng Biak Inpuiah Rorel Inkhawm an nei mek a. He rorel inkhawm hi General Conference an neih loh kum apianga an neih thin a ni a, rorel inkhawmah hi chuan hruaitu an thlang ngai lo bawk. Tun tumah hian Mizorama rawngbawlna lama thalaite kawng zawh tur lam thil tam tak an relin an sawiho leh dawn tih a chiang reng a, roreltu zawng zawngte i tawngtaipui ang u. Hetih rual hian rorela kal khawmte pawhin an aiawhte hre rengin, Pathian rawn chung zelin an hun hmang zo se ka ti hle a. Pathian nen ro rel turin duhsakna ka hlan a ni. - L.Z.Colney