SAWHKHAWK of the day Kum 2015 session tharah sorkar sikul, Higher Secondary School-te admission fee tihsak vek a ni dawn, sorkarin min puih theih tawh dawn loh avangin,’ an ti a ni awm e. Keini ang, zirlai nu leh pa harsa tak tak tan chuan a va manganthlak ve le, kan mang a ang lawk a nih hi! Zirlai hruaitute khan ke han pen teh u khai! ‘Pawisa a awm lo, hma kan la thei lo, hlawh kan la thei lo,’ a hnathawkten an tih reng laiin a thenah pawisa an sem lawi si, NLUP dawng pha ve si lo keini ang mi harsa tan chuan a manganthlak takzet a ni. - F.K.Pachuau Kar hmasa Zalen-ah khan mi pakhat khan a rawn fak cheu va, chhutsual pawh a tlem hret hret zel niin a rawn sawi a, kha kha ka tlawp e. In chanchinbu a ngaihnawm a, a huam zau bawk si a, a chhiar a manhla ka ti hle a ni. Chutih rualin Mizo tawng ziah dan rawn sawitu ang khan, tam tak hi chu a zawm tur leh tur lohvah hian inbuai niin ka hre ve tho mai. A headline-a inzawm thu ngei pawh a chhung thua zawm leh si lohte a awm a, in duh duhin in ziak a ang ka ti a, tan han la teh u. Mizo tawng dik leh dik lo hi a chhiar a innawm hleih ve viau a ni. - Malawma, Zt Kar Hmasa Article-a Pu Ramhluna Hnamte thuziak kha a ngaihnawm ka ti kher mai, a hunlai hre pha tan chuan a lunglenthlak em em bawk. Khatih lai vela radio ngaithla ve thin kha ka ni a, lung hlui a tileng hle a ni. Tin, Thukhawchang hi a ngaihnawmin a bengvarthlak thin khawp mai, Lalthlamuana Ralte hi lo tang zel teh se, min tibengvartu leh hriatna tha tak min petu a ni e. - Thantluanga An sawisel thin cheu va, tha takin in pawm zel niin ka hria a, inhmasawnna pawh a langin ka hria. Han tang zel teh u, in chanchinbu hi ngaihnawm kan tiin kan chhungkua hian Pathianni tukah hi chuan chhiar hmasa nih kan lo inchuh ziah a nia... - Maawma Chapchar Kut kan hmang zo leh ta a, a hlimawm khawpin ka hria. A hmuna reilo te ka lang ve a, kum a lo tam ve deuh tak vang nge, Mizo lâm chi hrang hranga lâmho kha nula puitling an tam lo riauva hriatna ka lo nei a, thenkhat phei kha chu naupang, Middle School kal awm rual lek lek kha an ni hlawm a. Mizo hnam lâm thiamtirna remchang tak a nih rualin nula/tlangval puitling chin hian kan lawm ta lo nge a thiam kan awm tawh lo, nge kan zir peih tawh lo. Puitling, thankin tawh ngeiin han ti thei se la lo ti ve mai mai, hmasawnna tura rawtna mai a ni e, huatah lak lovah aw... - Zuala Tl Mizote Kut hlut ber leh lawm hlawh ber, Chapchar Kut 2015 chu kan hmang zo leh ta a, a lawmna pui ber, Aizawl pawh programme ruahman dan a thain a hmuna kal mai ni lo, TV atanga lo thlirtu tan pawh a en a manhla hlein ka lo hria a. A boruak tiliantu atana Miss Chapchar Kut te kan ti a, a tha ka ti hle a, kum naupang ve deuh zawkte tan pawh a hlutawm phah dawn hle niin ka hria. Kan Mizo hnam thil tih dan hrang hrangte pho chhuah thar leh a ni a, a lawmawm ka ti a. Keini ang thalai, a bikin Aizawl khawpuia seilian, thingtlang nun tem hlek lova puitling tan phei chuan a hlu zual hlein ka hria a, kum dang zelah phei chuan hei aia Mizo lehzuala hman dan hi ngaihtuah chhuah theih ni zel ta se a lawmawm ngawtin ka ring. - The Man March 2, 2015-a chanchinbu pakhata chhuah, kum 60 chuang liam taa Zoram independence puan tawh angin an rawn ziak ta mai. March 1, 1966 kha MNF-in independence an puan ni kha a ni zawk lo maw? Kum 49 pawh a la tling si lo. - Sibuta YMA-in ChakMa chhiarpui neih a tum hi a dikin tha ka ti. Chakma hrim hrim hnawl tumna niin a lang lo va, Mizoram neitu Mizoten kan ram mi leh sa dik tak finfiah duhna avanga tih a ni a, anmahni Chakma-in emaw, state leh central sorkarin emaw lo dodal ngawr chi a ni dawn em ni? Dodal lovin an pui zawk a ni dawn lo’m ni? Ram dang mi chu ram dang mi an ni lo vem ni? - Zopa Sorkar hian sum leh pai neih loh avanga a harsa takzet a nih chuan ram hruaitute hlawh leh facility tha lutuk te, sorkar hnathawk hlawh leh facility tha lutukte hi tihniam ngam phawt se chuan mipui nawlpui chhiah chawi sang lutuk pawh hi pek a hahdamthlak deuh vang, - Scholes L.S.Khawlhring Mizo mipuite phurrit?tizualtu, sorkar sum indaih lohna hi Bill hrang hrang, chhiah, leiman, ration buhfai man tihsan leh tihsan loh te, thisen sawngbawlna man lak leh lak loh emaw, nawrh leh Total Bandh huaihawt emaw hmanga sutkian tum chi a ni lo. Thinlunga ram leh hnam hmangaihtu, hmathlir tha tak nei, Administration leh Financial Management-a a ngaihna hriain kan ramah hian rorel sela, chutah chuan mi retheite tan kawl a eng thei chauh vang tih hi mi thiamte ngaihdan a ni. - 8731002757 He Mizoram, Kristian rama Kohhran, Pathian khawpuia rawngbawltute leh roreltute hian Pathian thutak sawi tur an hre ta lo em ni? heti khawpa Kohhran mipuite thlarau lamah kan ro tak mai le? Thiamna lamah ni se Rev. Dr. - 8014161467 He Mizo Kristian ramah hian mi hausa leh thiltitheiten hnehna an chan zel avangin mi rethei kan dawihzepin kan bet tlawk tlawh zel si a. Kolasib pain a nupui raicheha a thih avanga huaisen taka dikna duh vanga FIR a thehlut ngam leh chanchinbu mite a la kawm ngam lehzel hi a va ropui a va faktlak tak em! Pathianin huaisenna dik tak a pe a ni ngei ang le! Mi huaisen, dikna leh rinawmna duhtute lo chhuak zel teh u. Hei baka Zoram thar a awm dawn chuang lo. Mi pamham leh mi duham, mahni hmasialten he ram hi an tirethei rei lutuk ta e. Kohhran, Pathian Khawpuia roreltute lah an ngawi tlat zel bawk si a. - Tea, Azl Mizoram Presbyterian Kohhran Hmeichhe Inkhawmpui lian chu Mamitah hman mek a ni a, hlawk taka hmang turin palai kal zawng zawngte duhsakna ka hlan a ni. Ka sawi ve duh chu Kristian Chhungkaw tam an teh dan hi a ni. Ni tin chhung inkhawm nei thei ringawt hi Kristian chhungkua an ni chuang lo tlata hriatna hi ka nei a, hei aia tehna rintlak leh tha zawk hi an ngaihtuah chhuak thiam lo a nih chuan ka hre lo va. Ni tin chhung inkhawm nei ziah chhungkaw member zingah hian an khawsak dana Kristian lem lo an tam em a, hei aia tehna rintlak hi ngaihtuah chhuah theih dan hria se ka ti ngawt mai. - Ramdina Ka tawrh hi Lalpan a phal, vui thei ka ni lo. Heng inhmuhsitna leh indiriamna te, sawichhiatna te, mualphona leh endawng te, hrehawm tinrengte hi ka tawrh ve hi Lalpan a phal zawk avang hian ka lawm a. A chhan chu nuamsa deuh tak chung hian Vanram a luh theih loh tih ka hre chiang em a ni. Hrehawm tam tak tuara Vanram kan luh a phal tlat alawm. - Hruaitea