Pu Chhuanliana BVT hi thalai hian kan ngaisangin kan rohlu a ni. Amah avang hian kan Zoram history-ah kan bengvar phah khawp mai. Kan hmanlai thawnthua mi MURA te hi a tak tak a ni em tihte hi a hriat dan kan va ngaithla chak ve. Kum upa lamte hian thil tak tak niin an sawi a, eng nge i hriat ve dan le? - ECY=TYC Tui harsatna hi chu kan PHE engineer-te vang hian kan tuar dawn tho, an ei ru nasa em mai, an in leh lote hi a ropui thei em mai, project pakhat cheng nuai 100 man central atangin hmu ta sela, 20 percent chu department officer-ten an sem thin. 70 percent-in hna an thawk thin an ti. Hman April 23 zana khawl chhia pawh kha tui pump-tuin zu rui chungin tui a pump a, a mutsan a, tanky-a tui awm lovin a pump tlaivar vanga khawl kha kang a ni. Mahse, department-in an zeppui tlat a, ban lova tui pump-naa a la thawk zui tlat hi a mak khawp mai. - THADUHA Tun lai khi lam rapper thar pakhat, mi dawra t-shirt man pe lova a kawr hnuaia lo hak hnan an man loh kha a tak tak a nih chuan a va khawngaihthlak awm ve le!! Chanchinbu hrang hranga an kawmnaah ruihhlo lakah ka fihlim a ti bawk sia, a chet duh dan hi a va class lo tel tek ve le! Riru fim pangngai tan chuan a tih theih dawn emaw ni le? Thiam kan lo tih ve reuh che nen aw... - Metal Hammer Mizoram luahtute hi Israel-ho ni ta se, tuna Mizoram map kan hman lai ni lo, kan zirlai pawlte leh mi thenkhatin Mizoram map an siam, ram zau zawk, kan pi puten, 'Hei hi kan ramri a ni,' tia an lo hauh chin hi chu an nei let vek tawh ang. Keini erawh chu tun ang renga kan kal chuan kan neihsa pawh hi kan chan belh zel ang. A him chin atanga tawngka chauhva humhalha aupui dum dum ai chuan kan ngaihsan Juda-ho anga rik deuh buaih hian a sawt zawk lo'ng maw?! - Ts-a Tukin chu Chawlhni tuk a ni bawk a, Lal Tawngtaina in sawi dan kha a dik em le? Ni tin kan ei khawpin.... tiha ei hi a thenin an lam sang thin, a dik lo. Ka chaw ei a tui lo tih kan lam anga hniama lam tur. Ropui te tia lam tur an tih avangin kan lam ve mai a, mahse Mizo tawng dik duhtute rilru a hmin thei lo; chuvangin, Ropuina te i ti tawh zawk ang u (Thiltihtheihna te, chawimawina te, ropuina te Lalpa ta a ni). Tam takin chatuan i ta a ni si a an ti, a dik lo, Chatuana i ta a ni si a, tih tur a ni. Lal Tawngtaina kan sawi dan tur, a thluk kan lam dan tur thleng hian Synod hian Kohhranhote hriattir thar leh se a tha ngawt ang. - 9856835945 A tul huna tlawm ngamte hi mi huaisen dik takte chu an ni. Kan duh dan anga thil kaltlangpui a nih loh hun pawha lawm thiam mi kan nih hi a tul a, he khawvelah hian zawng kan ngaihdan leh duh dan ang theuh chuan engti kawng zawng mahin thil a kal reng dawn lo tih a hretute vek kan ni si a. Hetah tak hian ringtu kan nihna a lanna tur tak pawh a ni. Ka tih chu ka tih a ni mai tia ngiahdan kan neih tlat chhung hi chuan kan la puitling tawk lo ve tia inpawm mai hi a finthlak zawk awm e. Duh dan leh ngaihdan kan nei lo tur tihna erawh a ni hauh lo. - 8415052704 Kan Home Minister zahawm tak, Pu R.Lalzirliana'n Buhchangphaia Assam police-te rawn chetna a tlawh chungchanga a thu sawi kha tha ka ti a, ka thlawp fai vek a, ram nu leh pa nih a tlingin pa chan a chang thiam hle a, ka chhuang hle a ni tih hi thu hmaah ka sawi duh a. Ka sawi tum sawi nghal mai ila, chu chu Buchangphaia Assam police in leh thlam thiah hi a rang thei ang bera sak that leh nghal vat hi a tul ka ti a, chubakah kan ram chhung, Saihapui (V)-a SSA sum hmanga Assam school rawn sak a rang thei ang bera vuak thiah vat hi a tul ka ti hle bawk. Kan ram an ta neih mek a ni, i hman hmawh ang u. - Menga BVT Kohhran kan nihna hi pawimawh ber a ni lo va, Denomination Kohhrana member punna kan duh viau pawh hi a tul ber lem lo. Ramthimah Muslim leh Hindu zingahte kan Kohhran din kher kan tum hi a tul ber a ni lo. Kohhran hi chu thih rualin a tawp der a, van kaina chu Krista rinna chauh a ni. Lal Isua chhandamtu a nih thu mite hmuhtir hi a pawimawh ber a, UPC?emaw, Salvation emaw, Baptist emaw, Presbyterian emaw nihtir tum kher hi chu a pawimawh ber a ni lo, pawla thahnemngaihna dah thain Isua Krista ringtu dik takah siam tum ila, Muslim-te chu Pucca Muslim ni mai rawh se. An Koran hi do ila, Allah pawh i hnawlsak lo vang u. Kan pawl Pathian biak dan leh tihdana inhruai luh kher hi ringtu dika insiamna a ni lo tih hriain, Non-Mizo, a bikin Muslim unau zinga rawngbawlnaah hian Krista ringa chhandamna hi i uar ber ang u. Hei hi van lam pawl hlawkna tur a ni e. - The Reporter Ka lo ti ve mai mai thin a, buhfai, khawnvartui retailer thenkhatte hi chu sorkar hian kum hnih dan zelah thlak thin se la, a tira fel leh buk dik duh fute pawh hi kum 2/3 hnuah chuan an phakar em em tawh mai thin a. Tin, an hlawkna turah chuan tihhreh an nei lo bawk a. Hei vang hian an phakar a chhuah tak tak hma hian thlak zel a fuh berin ka hria. - Moia dt. New Secretariat Complex-a thingkung puitling sa, department hrang hrangin sum tam tak senga an phun, uluk taka Forest Department-in an enkawl zui chu tun hnaiah dimna nek lek lova kih tluk an ni, a uiawm hle. Sorkar hian action a la dawn em aw...? - Pakula Aizawl sikul thaah kan fate kan luhtir ve thei lo, a fee a rapthlak lutuk! Aizawla sikul siam pakhat chuan ama sikulah a fate luhtir ngam lovin phaiah a dah daih, pawl 10 leh 12-ah chiah result tha neih an tum lehnghal! Mahni fate pawh luhtir duh lo khawpa sikul han hawnte chu tiin ka lo ngaihtuah ve mai mai. - LAL MICHIKA, AIZAWL

SAWHKHAWK of the day Police officer-ten constable-te an insakna atana an duh duha an chhawr thin hi a va tha lo em! Home Minister hian a intiam angin a va ti ngam leh si lo ve, sal ang maia an puten hna an thawhtir thin hi tihtawp vat a va tha ve. Home Minister hian a hre lo nge, a ngam lo zawk? Police officer Kohhran Upate pawhin an ti duh tho zuk nia, sorkarin officer-te ina pisa kai turin a lak an ni lo tih hriat a va tha ve. - Vana Pu