Sawhkhak  of the day VC leh Local Council inthlan chu a zo leh ta a, eng party pawh an lawm viau ni awmin a ngaih theih a. Khawtlang huap inthlanah hi chuan miin politics leh party bil lam ngaihtuah lem lovin kan khawtlang tana tha tur mi kan dap mai thin niin a ngaih theih a. In-candidate-te kan hmelhriat theuh, an zia leh an inchhungkhur nun thlenga kan hriatsakte an nih hlawm avangin inthlan hi a thianghlim viau zel niin a hriat a ni. Hetiang deuh hi ram pum huap inthlanah pawh hian ni thei se kan ram hian a thatpuiin a rinawm. Candidate-te chu kan hre kilhkelh lo pawh a ni thei a; mahse, kan ram tana tha tur hi kan dap leh thlan ngam a hunin ka hria. Mahni party tan avanga kan party candidate ngawr ngawr melh ai chuan VC/LC inthlan ang deuh hian kan ramin a tha awma kan ngaih hi thlang mai zel teh ang u. - Politics tuinu ninga Pathianni hmasaa Central YMA hmalakna rawn sawhkhawk kha ka ngaihdan chiah a ni. Sawisel ngai lai leh fel tawk lo deuhva chet chang chu nei thin mah se YMA hmalakna hi ka thlawp khawp mai. Mi tupawh hi kan che fuh reng thei lo va, kan kal dik reng thei lo, chet sual chang kan nei. A huhovah phei chuan lo chet phelh zeuh chang a awm hi a âwm lo hran lo; mahse, fimkhur erawh a ngai tih hriat thung tur a ni. - Rinawma Pu chhuanliana’n tunlaia a sipai tan dan a ziah hi a ninawm lek lek, a mi mal chanchin lo deuh a ziah thin hi chu a ngaihnawm ka ti thin over thung. - Chhuantei Pu chhuanliana’n a sipai tan chhoh dan a ziah atanga chiang ta em em chu, thil a hre rei thei hi a ni. A?thu ziah tam takah hian a hriat rengna tha lutuk hi a ni tih a lang fo tawh thin a, tuna a sipai tan dan a ziah atang phei hi chuan a chiang lehzual a, ka ngaisang sawt mai. Han ziak zel teh se, a mi mal chanchin nuihzatthlak tak tak pawh a tam ang, ziak zel rawh se. - Fakzuala Kelkang hi ka la kal ve chiah lo na a, ka lo ngaihven ve em em reng thin a. Kohhran min tihlim a, a nuam khawp mai. Kar hmasaa Lalthlamuana Ralte-in Thukhawchang-a a rawn ziah pawh a ngaihnawm khawp mai. Thil dang a ziah pawh hi mi a tibengvar thin khawp mai, thil harsa deuh pawh keini mi mawl hriat thiam theih tura a ziak thin hian a tihlu zual riauin ka hria. - Zotea Kelkang Kher kher’ tih tawngkam hi tunlai chu a lar khawp mai a, a boruak kal lai a ni bawk a, a awm viau mai. Ni e, ‘Kelkang kher kher’ lovah pawh kan duh chuan Pathian hi kan ko eih thei nameuh mau a; mahse, hetianga sawiseltute hian Kelkanga kalte ai chuan Pathian chu an ko tlem zawk ngeiin ka ring. Kelkanga kalte chuan an cham chhung zawng Pathian koh bak tih an nei lo, a kal lo, duh duha Pathian ko theite hi chuan kan awm hmunah hi chuan hman hle mah ila Kelkanga kalte koh zat leh an ko anga urhsunin kan ko lo tawpin ka ring; chuvangin, a kher kher lai hi ka ngaihdanah chuan a pawimawh tlat a ni. Pu Chhuanliana pawhin Ka Huang-ah a rawn ziah tawh kha. Pathian pawh hian a chang chuan ‘a kher kher’ lai hi a duh thin a nia. - MkSiama hawi lam neih chu a tha a; mahse, chanchin pheka chhuah ringawt te, sawi ringawt maite hi a tawk lo. Tin, thawhlawm thawh tha tura intih te, inkhawm thahnemngai tura sawi ringawtte pawh hi a tawk lo. KTP hruaitu te, Kohhran hruaitute hi an chet chhuah a ngai a ni zawk. Chuvangin, rinna hi thiltih tel lo chuan thi a ni zawk e. Kan hawi lam tura inkhawm kan ngaih pawimawh ang chiah hian thenawm khawveng inrem lohna te, rawngbawltu leh rawngbawltu inrem lohna te, Beram leh a pu inrem lohna te, thian leh thian inkara inrem lohna zawng zawngte pawh hi kan inrem theihna tur atana kan hawi lamte pawh ni tel ve se a tha ang. Eng emaw mai maiah hi chuan i inhambuai tawh lo teh ang u. Rawngbawltute u, in khandaih kha a hmanna turah hmang tawh teh u, in Jerusalem-ah khan Setana a pawng talh a nia. - Point Out TV fakna leh eng ilo velah hian Mizo tawng ziak dan dik hi ngai pawimawhhram hram teh ang u. A bikin heng ‘ah, in, a ni, ani’ tihte hi tunlai hian a ziak dan dik lova ziak a tam hle. Hetianga hman dik loh hi hmuh leh chhiar a khamawm hle a ni. Fakna (advertisement)-ah phei chuan a faktutekha hnim hnaihan châkawm loh sawt zawk! - Pakula Mi khirh tak leh zahna chang hre lo, sual Setana hi a huangtau em em a, chhungkua, khawtlang, mi mal nun tihchhiat vek hi a hnapui ber leh a tum lian ber a ni. Inhmuhsitna, inrem lohna thlentirtu pawh he sual Setana bawk hi a ni a; duhamna sual bawiha min hruai luttu tur pawh he sual Setana bawk hi a ni. Mahse, ringtute kan vanneih em emna chu he sual Setana hian kan nun a tibuai ve phak lo va; tin, khawvel tawp thleng pawh hian min thunun thei dawn lo bawk a ni. - 8415052704 Infiamna huang chhungah kan huang kan zauh zel a, tunah pawh changkang takin basketball lamah pawh hma kan la a, league mumal tak neih kan tum mek a ni ta a, a lawmawm takzet mai. Mizote hi kan peiha kan beih phawt chuan leh kan tum takzet chuan hnam dangte tluk lo tur khawp kan ni bik lo tih hi i inhre lehzual zel teh ang u. Basketball-ah bik hian kan pian phung chuan hnam dangte chu a pha lo a nih pawhin, kan huang kan zauh vena hrim hrim hi a lawmawm ka ti a, a buatsaihtute ka fak tak zet a ni. - Rha Khawvel sualna sang zelah hian hian Lal Isua hmachhuana amah ring tlatute chu mi awhawm leh mi vannei takte chu an ni mai. Nun hlimna te, thlamuanna te, engkima lawmna leh lungawina nun neitute chu Lal Isua hniak hnung rinawm taka zui tlattuten an nei a. Khawvelah hian nun beidawng kan tih te, buai manganna leh nun hlim lohna neite chu tete nge kan tih chuan Lal Isua ring duh lotute an ni tih hi ka sawi ngam a ni. A chhan chu ringtu nunah chuan beidawnna a awm ve lo va, hlim lohna te, rilru hahnaten an nun a tibuai ve tawh ngai lo. Chantawkah an lungawi a, thlamuanna nun neiin, engkimah lungawi tak leh nun hlim takin Lal Isua neitute chu an awm tawh zawk hi a ni si a. - @ Zu in ngai lovin zu an do hneh ngai lo va, zu in miin an do hneh zawk thin. A chhan chu zu in mi chuan zu cheng a hria a, ha nei si lovin a seh nat dante a hria a. A tawpah an in-control-in an in tlem tawlh tawlh a, an ngheiin Pathian an bel leh nge nge thin zawk a ni. Khitianga tih nachang hre lo chu an liam phak phak mai reng a ni zawk, lo dawn ve teh! - Suaka, azl.