SAWHKHAWK of the day Kan Chief Minister zahawm takin kan ramah cancer natna a hluar ang bawkin ei ruk a hluar a ti a, a sawi dik ngei pawhin a lang. Mahse, curruption-a nasa taka inhnamhnawih tawh, mahni hlawh bak pawh lak zel mai tumho hi an dik an va ti dawn em! Kan CM meuhvin hetianga a sawi tawh hnu hi chuan Kristian kan nih avang tal chauh pawh hian kan Kristian ram neih chhunah hmasawnna a lo awm theih nan curruption lakah inthiarfihlim theih tawh ang u. Ei ruknaah fihlimin kan thawh hlawh sorkarin min pek hi i lungawipui ang u, hun lo la kal zel turah kan inchhir loh nan. Kristian sorkar hnathawkte hian ei ru lo vek ngam ila, Kristian ni ve lote pawh hian min entawn ngei ang. Sorkarin kan thawh hlawh min pek hi i duhtawk tlang teh ang u. - 8014357478

News leh article-ah te TUIKUKHO tun hnaia 'Bru' intiho chanchin in rawn ziahte leh in sawi thin hian, 'DISPLACED' tih hi khawngaih takin rawn ziak tel tawh lo hram teh u. A chhan chu anmahni duhthu ngeia chhuakte hi displaced an ni thei lo hrim hrim a. Tu Mizo fate mahin an in leh ram kalsan hum ruak takngial pawh kan luahsak loh hi! DISPLACED dik tak zawkte chu kan unaute, RIVUNG leh SAILO lo lal tawhna ram, Sakhan tlangdunga mite zawk, anmahni TUIKUK MI SUALTENan um darh leh vaute ngei kha an ni zawk e. - Valpuia pa Lalropuii Pachuau hla sak, 'Matehawngi' tih hi, 'Mahte'n hawng i,' tih tur a ni e. A phuahtu hian riang leh mal inti taka 'Keimah chauhvin ka'n hawng hneng hneng ang e,' a tihna a ni. Pu Ngurthangvela'n 'Zu kan rui e,' tih hla a siam hi a that viau rualin, 'Chawltui ningzu, i sakhming mawi,' a ti kher hi chu a tul lovin ka hria. Engtik lai mahin zu hi sakhming mawi a nih kan hre ngai lo va, a in mi chhungkaw tina harsatna thlentu a ni tlangpui si. Vawi thum vel lai a hlaa a tisakhming mawi hi chu ka lo helh ve deuh tlat mai. - Puipuii pi Keini Mission Veng DYO Hall bula gas la thinte chu gas semtuten gas card pawh a ngai lo, kan free sale an tia, a thleng hmasa sain kan la a, trip khat (bur 50 vel) la zo tur awm loh chang pawh kan tawng fo tawh asin le! Vanbuangi gas agent hnathawk leh neitute hnenah lawmthu kan sawi mawlh mawlh e. - 9862726534 Kan hotupa ber, Chief Minister Hawlan RTI Week hmannaa, 'Kawng engkimah lepse kan ngam tur a ni,' a tihte leh curruption veng tura mipuite tawiawmna tun aia nasa lehzuala a ngennate kha a ropui hle mai. Mipui kan tan a tul takzet ta. Roreltute pawhin huai takin hlemhle leh mi dik lote hrem zel se, hemi avanga mi tlemte an lungawi loh chuan mi tam tak kan lawmna a ni zawk ang. Mi sualte dan anga hrem zel a hun ta. - 8794316079 Thil kal tawh leh liam tawh sawi chhuaha thiam zawk nih tuma inhnialna hi bansan a hun tawh. Politics inhnialna awmze nei lo hi bansan a hun tawh takzet, thalaiten kan hne palh ang che u. - 9774617557 Hindi Teacher-ho chu an va khawngaihthlak ve! Hmanni lawkah an hlawh rawn thlen chungchangah sorkar chunga an lawmthu sawina kan lo hmu a, tunah an hlawh a la rawn thleng lo an ti leh tawh bawk sia, a va mak awm ve! Kum chanve dawn hlawh lak theih loh chu a hrehawm khawp ang tih ka rinpui. Sorkar pawh hian a ngaihsak tawk lo deuh a ni lo maw? Mawhphurtu lam tan chak taka nawrpui a va hun tawh ve. - Pakula Ei ruk dawna 'depression leh thisen sang' nei hlawm mang si lo, ei ruk hnua 'depression leh thisen sang' nei nasa leh hle si! Ka hrethiam hlawm lo ve! - Suaka, Bvt Kan dam chhung hian Pathian thutak chu kan sawi tur a ni si a. PATHIAN thutak lo hi chuan thinlung lairil a fan tak tak thei lo va, vawiinah hian engin nge min titlei a, eng nge kan tleipui ber hlawm le? Reilo te atana nawmna nge kan thlakhlelh a, kumkhua chatuan pawha chuai ve ngai lo tur leh kumkhaw nawmna tur zawk le? He khawvel hi zawng reilo teah a ral thuai dawn, rei a rial tawh dawn si lo; inpeih lote inpeih a hun tawh takzet zet a ni. Ropui takin Lal Isua a lo kal hunah hlim tak leh lawm taka tawk thei theuh turin i inbuatsaih sauh sauh zawk ang u. - 8415052704 Tun lai hian Zawlnei Jeremia 23:15 thu, 'Ram pumah Pathian pawisak lohna a chhuak' tih thu kha a thleng dik mek niin a lang. Ram hruaitu lu ber leh amah tantute chuan chal hnawihsen pawi an ti lo va, coconut sawhkeh pawh pawi an ti hek lo. Bible-in 'sual tinreng bul' ti hiala a sawi zu zawrh phalna pek tum mek tantuten Pathian Kohhran an sawichhiat phah ta. Kohhran hruaitute aw ai chuan ram hruaitute aw ngai pawimawh zawktu kan thahnem ta hle a, ram hruaitute leh anmahni tantuten mipui hmaah Kohhran demna thu hial an sawi chhuak ta fo va, ziakin an theh darh mek bawk a. Kum 1987-88 laia Kohhran aw pawisa lo ram hruaitute leh anmahni tantute kha mak takin an tlusawp a. Tuna ram hruaitute ni mekte erawh hi chuan Pathian hnena an tawngtai thu an sawi a, an tawngtai dan leh Kohhranho tawngtai dan erawh a inang lo niin a lang thung. Hemi thuah hian engkim hre thu Pathian rorelna a lo la lan ngei kei chuan ka ring. - Omoma Pu Sumah miin a rilru zawng zawng a pek chuan mi hmantlak a ni ngai lo. Kan dam chhung khawsakna atan hian sum chu pawimawh tak a ni a; nimahsela, sum ringawtah miin a rilru a pek chuan chhungkua pawh a vawng fel thei lo va, chhungkua chuan harsatna leh buaina a tawng ngei ngei a ni. Chunakah Pathian aia sum kan lo hmachhuan zawk chuan a fuh thei lo va, chhungkua a thlahthlam a, ama chungah pawh chhungkua a vui bawk thin. Amah Pathian lovin a thilsiam kan lo Pathian hian pawi tak a ni. Sum pawh hi Pathian avanga awm chauh a ni tih kan hriat a tul hle. Chuvang chuan chhungkua i vawng him tawkin i inhria em tih lo inzawt teh. Taksa bawrhsawmna han tawk ta chiah la, i sum kha ip pawpa thlak ang hlauhvin a ral hiau hiau mai ang. Chutah chuan sumin a chhan zawh lohzia che chu i hre mai ang. Pathianin i damdawi ei thinte kha mal a sawm loh chuan i tan thihna turah a chang thei bawk. - The Slam Mahni hmasialna leh duhamna hian mihring nun hi a tibuai ber mai a nih hi. Ram rorelna, sumdawnna, in sak danah te, ramri hung danah te Pathian nung reng a lang lo ve. Kan Pathian hi dikna Pathian a ni tih hre reng ang u. Dik taka ti thinte chauhvin van ram an kai dawn a ni. - 9856836216