ZALEN March 23, 2025: Mizoram sawrkarin tun thlenga sawhthing leina atana sum a sen tawh zat chu Rs. Vbc. 38 vel a tling tawh a, hetihlai hian a hralhna atanga hmuh tawh chu Rs. Vbc. 2 bawr vel chauh a la tling a. Hemi chungchangah hian Chief Minister Lalduhoma chuan kuthnathawktute tana ding an nih thu a sawi.

March 20, 2025 zana assembly budget session-ah he thu hi sawiin, chief minister chuan sawhthing leina atana sum pek chhuah chu Rs. Vbc. 38 bawr vel a tling tawh tih sawiin, district agriculture marketing committee atanga sawhthing an lei tawh zawng chu qtls 58,847 a nih thu te, buffer stock point atanga hralh chhuah tawh zat chu qtls 48,040 a nih thu a sawi.

“Sawhthing hralhna atangin pawisa tlem kan hmu let ve tawh a, Rs. Vbc. 2.84 a tling. Kan sen a tam a, kan hmuh let erawh a tlem,” a ti.

“Sawhthingah dawrtu kan hmu ve tan a, kg-ah Rs. 20-ten min dawr a, kan hralh lo thei lo, a then chu Rs. 25-te pawh a ni a, a tha pawlah Rs. 27-te a ni,” ti bawkin, dawrtu an neih ang ang chu a chhiat mai dawn avangin an hralh zel thu leh hralhna a tlem leh an chawi hnem a nih mai thu a sawi a, farmer-te tana ding an nih thu a sawi.

“Eng ang pawh lo ni se, farmer-ten kg-ah Rs. 50 an ak haw dawn hrim hrim, chu chu kan dinna a ni. Tunah kan kudam a khah avangin a dang kan la thei lo a, tih ngaihna a awm rih lo a, min hre thiam turin kan ngen,” a ti bawk.

Hmunphiah chungchang pawh sawiin chief minister chuan a ro certificate of origin pek chhuah tawh chu qtls 31,385 a nih thu leh empanel broom buyer-ten an lei tawh zat qtls 8,536, non empanel buyer-te lei tawh zat qtls 26,457 leh ZOHANDCO lei tawh zat qtls 4,000 a nih thu a sawi.

“Kan farmer-ten grading leh tihro an harsat a, chuvang chuan ‘a grade loin, a pawlhsawpin kg-ah Rs. 80-in i lei ang’ kan ti a, tuna empanel buyer ten an lei bak leh mimala an hralh bak chu kan lei vek dawn a, ZOHANDCO ah kan pe ang a, annin an lo process ang a, an hralh leh hunah a man min rul ve leh dawn a ni,” chief minister chuan a ti bawk.

CM thusawi dang thenkhat :

1. 2025-26 atan hand holding-ah Rs. Vbc. 350 dah a ni.

2. Buhhum qtls 1,457.63 lei a ni tawh a, sem sen Rs. nuai 43.72 a ni a tling.

3. Hmunphiah ro leina atana ZOHANDCO-a pek tawh Rs. Vbc 6.73.

4. Ram chhunga ziak leh chhiar thiam tamna ber Mizoram a ni tawh.

5. Biometric attendance hmangin, sawrkar hnathawkte chu mipuiten an pawisain an ruai a, a hunah an thleng tur a ni a, a hunah an haw tur a ni.

6. Sem policy sawirik a ni tawh lova, thawhrim inzirtir a ni.