ZALEN April 17, 2026: Mizo Hnam Run chhung inkhawm vawiina neihah MNF Senior Vice President Dr. R. Lalthangliana MLA chuan thu sawiin, Aizawl Municipal Council hi MNF kutchhuak a ni a, rorelna dik tak nena kal tlanga MNF din liau liau a nih thu a sawi a. Tun AMC inthlanah hian kan Candidate-te kan uluk hle a, sawrkar lai hi chak turah an inngai ngawt thin a, sawrkar lai anih avang ngawtin Municipal Election-ah hian an tlin phah dawn lo a ti.

Dr. R. Lalthangliana chuan India ram khawpui tam takah ruling party ni lo te pawhin Municipal-ah hian hnehna an lo lak tawh thin tawh dan a sawi. ​MNF chu sawrkar lai ni lo mah se, he inthlanah hian hnehna an chan ngei a rin thu a sawi. "Kan tling anih chuan AMC corruption free sawrkar kan din ang," a ti.

Dr. R. Lalthangliana chuan ZPM sawrkarin Lunglei khawpui hmasawnna tur LMC sum chu a zawnin (2024-25) ah cheng 9,23,12,000 leh (2025-26) ah 9,46,80,000 belhkhawmin cheng 18,69,92,000 lai anih thu a sawi a. LMC hian MNF sawrkar hun lai kum 2023-24 chhunga an hmuh cheng 6,35,44,000/- (cheng vaibelchhe 6, nuai 35, sing 4 leh sang 4) bak finance commission sum pek an la dawn loh thu a sawi bawk. "Tun financial year tawpah sawrkar inthlahdah vangin SASCI sum cheng nuai 11,152 a lapse bawk a, ZPM Sawrkar financial management thiam lo tak hi AMC-ah thlan tlin chi an ni lo," a ti bawk.

Health Minister hlui Dr.Thangtea chuan, "MUHCS hi mipuiin kan thlamuanpui lo a, min um chiai mek a. Pensioner phei chuan tunah hian MUHCS 2.0 an zawm duh lo a, sawrkarin an nawr mek a. Mizoram sawrkar hnathawk Medical Reimbursement ti bovin, an hlawh cut luih sakin MUHCS an zawmtir vek a, inziah luh man a sang em em hi miretheite phurrit a ni. Private Hospital thliar bik neiin MUHCS kalpui a ni a, party pakhat chuan scam lian tak a awm e, an ti mek bawk," a ti.