Aizawl August 13, 2024 : Nimin Thawhtanni tlai khan ZPM General Headquarters-a General Secretaries te chuan Chief Minister chu a Office-ah an hmu a, Sawhthing Grade A leh B siam tumna chungchang an sawipui a, Chief Minister hian Sawhthing lei leh hralh chungchangah Grade A leh B a awm loh tur thu a lo hrilh a ni.

Chief Minister Lalduhoma chuan, “Ruahmanna hmasa ah chuan Sawhthing lei leh hralh chungchangah Grade A leh B siam tumna a awm a, hei hi a chhan chu, tunhma lamin Sawhthing hralh chungchangah rilru pamham pu tawk an lo awm thin a, thenkhatin lei kai tifai mang lo leh a buk rih theih nan tui lo leih huh duh tawk te an awm thin a, hei hian insumdawn tawnnaah harsatna a siam thin tih kan hria a, kan sumdawnpuite nen thawhhona tha leh tlo kan neih theih nan he ruahmanna hi siam a ni."

"Amaherawh chu mipui lamin Sawrkar ruahmanna hi an hriatthiam chiah loh avang leh kan kuthnathawktute rilru a hnual ang tih hlauin he ruahmana hi mipui hriatthiam zawnga her rem a ni a, Grade A leh B a awm dawn lo a ni. Hetih lai hian sawhthing chingtuten an hralh dawn hunah an sawhthing chu a fai tha hle tur a ni a, rilru pamham pu leh hlawk tum lutukna avanga insumdawn tawn nana him lo thil lo ti an awm a nih chuan, a hralhna kawnga harsatna an tawk a nih pawhin sawrkawin mawh a phur dawn lo a ni,” a ti.

Chief Minister chuan, “Thlai thar lei hi Sawrkar Flagship pawimawh ber a ni a, inthlan hma atanga mipui hnena kan lo aupui tawh a ni a, kan rama kuthnathawhtute khaichhuhana tura hmalakna pawimawh tak a ni a, Pathian pawhin mal a sawm ngei kan beisei a ni, mipui kan ti beidawng thiang lova, kan ruahmanna a hlawhtlin theih nan helama mawhphurtu ten ngawrh takin hna an thawk mek a ni."

"Tlaithar lei leh hralh chungchangah hian hnam dangten Mizote chu hnam rinawm leh sumdawnpui tlakah min ngaise kan duh a, tunhma thil avanga mipui rilru puthmang lo kal diktawhlote pawh siamthat kan in beisei a ni. ZPM chu mipui Sawrkar kan nih angin thil tha turah chuan mipui aw kan ngaithla zel dawna, a tul hunah chuan huaisen takin kan thu ah kan ding tlat thung dawn a ni,” a ti bawk.