August 22, 2023; Mizoram a sawrkar damdawiin zingah State Referral Hospital, Falkawn/ZMC ah chiah MRI khawl dah a la ni.

Vawiin Assembly Session zawhna leh chhanna hunah Siaha bialtu MLA Dr. K. Beichhua zawhna chhang a Health Minister Dr. R. Lalthangliana sawi danin, MRI khawl ZMC a dah a nih bakah, ZMC ah vek CT scan khawl dah a ni a, Civil Hospital, Aizawl leh Civil Hospital, Lunglei ah te CT scan khawl dah a ni bawkin, tun dinhmunah Siaha District Hospital ah CT scan khawl dah tumna a awm rih lo.

Member te zawh belhna chhangin MRI khawl hman tlak chu Rs. Nuai 600 atanga 800 te a ni tih sawiin, Covid vanga sum harsatna nen duh anga chet a harsat thu a sawiin, tun dinhmunah Mizoram a sawrkar damdawiin zawng zawngah oxygen plant dah fel vek a ni tawh niin a sawi bawk.