ZALEN February 6, 2025 : MPCC General Secretary Joseph Lalhimpuia, Ex MLA chuan Mizoram Sawrkar hian Airport Authority of India hi a be theilo tak tak nge a be duh lo a ti.

Vawiina Zobawk-a INC Local Council candidate leh party hruaitute nen an inkawmnaah Joseph Lalhlimpuia chuan, "Lengpui Airport chungchang sawihona Zonet TV buatsaih ah MLA TBC. Lalvenchhunga chuan AAI hotute nen Video Conferencing hmanga an inbiak thu a sawi laiin TV lama interview-naah Chief Minister Pu Lalduhawma chuan AAI chu lehkha a an dawr thu leh chhanna engmah an hmuh loh thu a sawi a, Lengpui Airport Run Way sir ram thenkhat chu a man an chhiar zat anga Indian Airforce ten an lei duh thu leh thil itawm tak nia a hriat thu a sawi bawk."

"CM-in TV interview-na lama a thusawi atang hian Lengpui Airport hralh chu kan sawrkar hian a lo tum ngei niin a hriat a, thui tak hmalakna pawh an lokal pui tawh niin a ngaih theih a ni. State pakhat sawrkar ve siin AAI kan be thei lo tihte hi thil zahthlak tak a ni a, an be thei lo nge an be duh lo tih hi ngaihtuah tham a ni," a ti.

MPCC Gen.Secretary chuan, "Congress sawrkar lai kum 2009 September-ah Lunglei lama Airport siam dan a awm em tih enfiah turin AAI lam hotu - R. Raja Sekhar, General Manager ; NV Atale, Jt. Gen Manager leh SK Gupta Dy. Gen. Manager te chu Congress sawrkar khan Lunglei hmunah ngei a hruai thlen theih laia tuna kan sawrkarin AAI be thei lo anga an insawi hi a mualpho thlak hle a ni," a ti bawk.