Sawrkar hmalakna a tha
May 03, 2020
  • P.C.Lawmkunga
  • Hripui tihbaiawm tak mai chuan thlipui ang maiin khawvel a nuai mek a. Chutih karah chuan keini Mizoram, khawvela ram kilkhâwr ber pawh min zuah hauh lo mai a, abiling abalanga kan chêt a ngai ve ta a nih hi. Mahse, vanneihthlak takin tun thlengin ram ziaawm ber pawl, he hri chhia avanga thi la awm lohna state kan la ni a. Kan Mizopuite ram dangah an lo vanduai a nih pawhin Mizoram chhungah chiah chuan he hri avanga invui liam kan la awm lo hi vanneihthlâk tak a ni.
  • Chutih lai erawh chuan he hripui vêng tura hma latute erawh chu namen lovin an hah thung a, mipui lam chu tawmim tura hrilh kan nih laiin, he hri daitheu tura thawktute erawh chuan a thim a var thlu lovin an thawk tak meuh a ni. “A fakna a dai tawh lo’ng,” tih hla pawh sak khum ila, a inhmeh viau zel ang.
  • Hetianga he hri dang tur leh a vei palhte pawh enkawlna tha nei tura hma la hmasa ber leh kan rinpui ber chu sawrkar hi a ni ngei ang. Mizoram sawrkar hian he hri leng laka invenna turin rang takin hma a la a. Thlawhna tumhmun leh ramri-a inkalpawhna hmunahte he hri vei leh vei lote thliarna hmun a siam thuai thuai a. PM-in March 22, Sunday-a public curfew a puan hma fe khan Mizoram sawrkar kar hian hma a lo la fe tawh a ni. Ram pum inkharkhipna puan, April 24 zan hmain Mizoram sawrkar chuan inkharkhip hi a kalpui tawh kan ti thei bawk ang. Engkim famkim thlep thlawp vek lo mah se, hetianga sawrkarin rang taka hma a la hi kan thatpui tlang hle ti ila, kan tisual âwm lo ve.
  • Hetianga hna thawk thei lova inkharkhip tlat tâkah chuan harsatna hrang hrang a lo awm ta ngei a. Ei leh bar leh ni tin mamawh sem rual thu-ah hma lak a lo ngai a. Chutah chuan sawrkar kut leh ke bera ?ang turin khua leh veng tinah Hna Thawktu Pawl (Task Force) indin nghal a ni a, an thawhrimzia chu sawi sei a ngai awm lo ve. He pawl hi Kohhran, Local Council leh YMA atanga lak khawm an nih avangin mipui an huap zo hle a. Khawi laiah emaw fimkhur luata lo che fawr deuh an lo awm a nih pawhin a tlangpuiin task force-te hian an thawk tha hle. Anni leh Horticulture Deptt tangrualin chawhmeh hring min pe zauh zauh theite hi a lawmawm hle a ni. Anni hi awm lo se khawtlang rorel a buai nuai ang a, mipui kan bengchheng viau mai thei. Hetianga veng tin inkaihhruaina fel tak kan nei hi a lawmawm a, eng emaw chenah sawrkar thupek kengkawhtute an nihna lai pawh a awm a; chuvangin, sawrkar pawhin puih theihna kawng kawngah chuan a pui zel hi thil lawmawm tak a ni.
  • He hri dona kawnga langsar ber nia lang chu Health Department hi a ni. Vanneihthlak takin he hri chhia vei emaw, rinhlelh emaw te dah hranna tur dedicated hospital, ZMC-ah an han siam hlauh mai a. He referral hospital leh college hi lo awm lo se chuan kan talbuai dan tur hi ngaihtuah thiam pawh har tak a ni. Kan hospital dangahte hian he hri vei leh rinhlelhte han indah tehreng ila, kan inchiah piah nasa dawnin social distancing-te chu “khawi lamah” tih a ni ringawt dawn a, a buaithlak dan tur chu sawiin a siak lo vang. He hri vei leh vei lo enna tur khawlte pawh Health Department chet chakna azarah kan nei ve thuai mai a, thawktute tan hna a tiawlsam hle a. Doctor, nurse leh para-medicos te inthuamna tur chenin kan nei ve ta, lawmawm tak a ni. Mizoram pawna he hri veite pawh ngaihvenin thu thar ber ber min hrilh reng thei a. Ni tinin ZMC News Bulletin hi kan nghak ta thuap mai a nih hi.
  • Pathian khawngaihna chu ni fo mah se, Mizote kan tanrualna rah niin a lang. sawrkar deptt hrang hrang - Health, Police, district administration leh khawtlangte kawi kawm thin ang thapa kan tanrualna hian rah tha a chhuah a, a chhuah zel dawn tih hi rinhlelh tur a awm lo ve. He kan buaina avanga tui leh kawlphetha pekna a buai nuai kher lote pawh hi thawktute an fakawm. Mipuiin thuawih kan zir a, khawi laiah emaw lo rik laih awm zauh thin mah se mipui hian thu kan awih hle. Kan puipunna reng reng Kohhran thil lam thlengin kan khâr hmak hmakte hi a tha hle a ni.
  • He kan buai chhunga thil chhinchhiahtlak tak mai chu mi dangte tana luan chhuahna ropui tak lo lang hi a ni ang. Kohhran, pawl leh mi mal tam takin sum leh bungrua an theh khawmin an sem chhuak nasa hle mai a. CM Relief Fund thlengin a vaibelchhe telin an vawm khawm tawh a. Chungte chu Mizoram chhunga mi harsate mai ni lovin ram danga tangkhangho tan pawh sem chhuah a ni ta zelte hi kan inhmangaih tawnna lo lang chhuak ropui tak a ni. Chutih laiin sawrkar pawhin he relief fund atang chauh ni lovin Health leh department dang atangin he hri dona atan hian vaibelhchhe 15 chuang tehmeuh a theh chhuak tawh bawk a ni.
  • He hri do tura Mizoram sawrkar hmalakna aia tha hi khawii state-ah mah a awm chuangin a rinawm lo va. State thenkhatte phei chuan an sepui ruah tuar ngawt ngawt emaw tih turin chetlak dan vak an hre lo. Hman nia kan thenawm state pakhata Mizo doctor ngei an vui liam danahte khan an state sawrkar khan thu mu leh mal an nei hlei thei lo emaw tih tur a ni. Mizoram anga local task force siam pawh hi state dangah kan hre lem bawk lo. Kan inchhuang bik tur chu a ni hauh lo va, chutih lai erawh chuan Mizoram sawrkar leh mipuiin hma kan lak dan aia tha hi khawiah mah a awm chuang lo niin a rin theih a ni.
  • Mihring hian thlamuanna kan zawng thin a, harsat mangan lai phei chuan kan zawng nasa lehzual. Tun tumah pawh thlamuanna thuchah sawitu evangelist leh speaker e kan ruai nasa hle. Home Crusade kan tih mai thlengin kan buatsaih a. An sawi tha, thahnem pawh an ngai bawk. Thlamuanpuitu tam tak lo awm rawh se. Chutih lai erawh chuan kan hmuh theih pathian, lei sawrkar hian kan tisa thilah chuan hian thlamuanna chu min pekna chen a awmin a lang. Thlarau lama thlamuanna kan la nei lo a nih pawhin tisa lamah chuan sawrkar hi kan thlamuanpui thin a nih hi. Chuvangin, sawrkar hi tawiawm zel ila, tihsual leh hmaihthelh an neih pawhin a deusawh zawng ni lova duhsak taka thurawn kan pek zel hi a duhawm hle ang.
  • Chutih lai chuan ngaihtuah tur pakhat awm chu hei hi a ni. He hri hi engtik hunah pawh lo kiang ta se, kan dinhmun ngaia ding leh tur hian hmalak tur a ko hle dawn a. India ram pum sum leh ei leh bar dinhmun a tlakhniam chuan a tuar hmasa ber turte zinga mi kan ni dawn bawk. Chutah chuan kan mamawh ber, kan ei khawp buh leh thlai kan thar ngei ngei a ngai ang. Sumdawnna liante chu lo tlachhia an nih pawhin kan tuar dan a nep ang. He hri hi tâm hruai a nih dawn vaih erawh chuan tun atanga buh leh thlai thar tur leh a kaihhnawih lama tan kan lak nghal hi a tul khawpin a rinawm.

Latest News & Chhiar Hlawh