Aizawl July 2, 2024 : C Lalsawivunga, Minister, Art & Culture, LAD, DC&MA etc chuan July 1&2 , 2024 hian Lunglei khawpui chhunga a department chan ho office hrang hrang leh department hmun hmate a tlawh kual a, sawrkar hnathawh chu eizawnna mai ni lovin Pathian rawngbawlna a nih thu a sawi.

Sawivunga chuan,"Pathian zarah kan kuta rorelna a lo awm khan kan hotuten hna chanpual an sem a, a hminga Minister niin department chanpualte kan nei ve hlauh mai a, heng ka department enkawlte hi tha taka enkawl a, ram leh hnam nghahfak ni tura enkawl ka intiam a. Pathianin min kaihruai zel niin ka hria a, thawhpui tha tak tak mai hmun hrang hrangah an lo awm hi ka lawm hle a ni," a ti.

Sawivunga chuan, "Sawrkar hnathawkte hi intuaithar kan ngai ve fo va, eizawn nan mai ni lo, ram leh hnam tana mi tangkai leh innghahna kan nih avangin kan inthlahdah hi a thiang lo a ni. Rinawm taka hnathawh hi Pathian duhzawng a ni a, sawrkar hnathawh hi eizawnna mai ni lo vin Pathian rawngbawlna a ni tih hi kan hriatreng ka duh a ni, mipui tan dawr kan nuam tur a ni a, puih an ngaihna apiangah phur takin kan pui tur a ni. Mi thenkhat chu bang bo leh mawlmang taka office lo kal an awm thin a, chungte chu dawhthei taka an hriatthiam loh te hrilhfiaha kaihhruai hi kan mawhphurhna a ni," a ti bawk.